Ал эми мурдагы өкүл Сатыбалдиев берген арызына ылайык жумуштан алынганы айтылат. Өкмөттөгү акыркы кадрдык жүрүштөрдү көпчүлүк быйылкы жылдагы шайлоо менен байланыштырууда.
Жалал-Абаддын эски жана жаңы облус жетекчилерин вице-премьер-министр Кубатбек Боронов борбордон ээрчитип келип, аймактагы активге премьер-министрдин буйругу менен тааныштырды:
- Өкмөт башчы Мухаммедкалый Абылгазиевдин 22-январдагы буйругуна ылайык Кыянбек Сатыбалдиев өкмөттүн Жалал-Абад облусундагы ыйгарым укуктуу өкүлү кызматынан бошотулду. Ага өзүнүн берген арызы негиз болгон. Ушул эле күндөгү дагы бир буйрукка ылайык Нурболот Мирзахмедов анын ордуна ыйгарым укуктуу өкүл болуп дайындалды. Сатыбалдиев 3 жылдан ашык облусту көтөрүүгө бүт аракетин жумшап, адис жана коомдук ишмер катары жакшы иштеп берди десем болот. Азыр ден соолугун чыңдаш үчүн кетип жатат, андан соң анын да башка жумуш ордун чечкенге аракет кылабыз. Мирзахмедовду Жалал-Абадга алып келүү - өлкө башчысы менен өкмөт башчысынын чечими болду.
43 жаштагы Кыянбек Сатыбалдиев өкмөттүн Жалал-Абад облусундагы ыйгарым укуктуу өкүлү болуп 2016-жылдын октябрь айынан бери иштеп келе жаткан. Ал бул кызматка келгенге чейин 2015-жылы КСДПдан Жогорку Кеңештин депутаты болуп шайланган. Ал облуска башчы болуп келгенден кийин кээ бир гезиттер жана басылмалар анын жогорку билим тууралуу дипломун 800 долларга сатып алганын жана буга чейин Майлуу-Суу шаарында мэр болуп турган кезде мыйзамсыз иштерди жасаганын жазып чыгышкан.
Бирок Сатыбалдиев өз кезегинде жасалма диплом аркылуу кызматка келгени тууралуу маалыматты төгүнгө чыгарган. Жумуштан кетишинин себебин мурунку ыйгарым укуктуу өкүл ачыкка чыгарган жок:
- Убактысы жана өз нугу менен жакшы иштеп бердим десем болот. Ар бир тармак боюнча 2019-жылды алгылыктуу жыйынтыктап алдык. Өкмөткө жумуштан кетүү боюнча өз каалоом менен арызымды жазып бердим. Алдыда бир топ пландарым бар, убагы келгенде белгилүү болот. Азыр ден соолугумду чыңдап, андан соң кандай жумуш кыларымды айтам.
42 жаштагы Нурболот Мирзахмедов 2010-2015-жылдары Сузак районунун акими болуп иштеген. 2015-жылы «Бир Бол» партиясынын катарында Жогорку Кеңештин депутаттыгына талапкер болгон. 2016-жылы Эсеп палатасынын аудитору, 2018-жылдын апрель айынан тартып өзгөчө кырдаалдар министри болуп иштеп келе жаткан. Мирзахмедов мамлекеттик кызматкер катары өкмөт буйруган жакта иштөөгө даяр экенин билдирди:
- Өкмөттүн жаңы кызмат боюнча сунушу мен үчүн күтүүсүз болду. Анткени Жалал-Абад облусу мен үчүн жат жер, жат эл эмес. Буга чейин ушул жерде иштеп, тажрыйба алып, борборго жөнөттүңүздөр. Өкмөт башчыга да буга чейин ишеним көрсөтүп министрликке көтөргөнүнө ыраазычылык билдирем. Бул - кызмат, мени кайсы жумушка жөнөтпөсүн таза, эл үчүн иштеп берүүгө аракет кылам.
Быйыл июль айында экс-министр Мирзахмедовдун кеңешчиси Нурбек Жолборсовду Башкы прокуратура Жазык кодексинин 319-беренеси («Коррупция») боюнча козголгон сотко чейинки өндүрүш ишинин алкагында камакка алып, ал кайра үй камагына чыгарылган. Жолборсовдун жакындары анын кармалышына Чукул кырдаалдардын таасирин жоюу боюнча түндүк борборунун жетекчиси Асылбек Жусубалиевдин көрсөтмөсү негиз болгонун айтышкан. Анткени тергөө менен кызматташкандар министрге кеңешчиси аркылуу акча берип турганын айтып доо коюшкан. Ишти учурда Аскер прокуратурасы тергеп жатат.
Коррупцияга каршы күрөш боюнча элдик көзөмөл кыймылынын облустагы координатору Максатбек Абдукаимов бул кадрдык алмашуу парламенттик шайлоого байланыштуу деп эсептейт.
- Бул кадрдык өзгөрүүлөрдүн баары алдыдагы парламенттик шайлоого байланыштуу, - деди ал. - Учурда партиялар арасында жең ичинен тирешүү жана команда түзүү процесси күч алды. Анткени аймактардан электорат чогултууда да ыйгарым укуктуу өкүлдөр чоң роль ойнойт. Анткен менен аларда бийлик жана эч кандай бюджет жок. Облуста эч кимди ала албайт же кызматка коё албайт. Экинчиден, Нурболот Мирзахмедов жетектеп турган Өзгөчө кырдаалдар министрлигинин жетекчилик ордун да бошотуш керек болчу. Азыртан тартып бийлик үч партияны бириктирип, шайлоого даярдап жатканы байкалып жатпайбы? Ошол эле учурда көпчүлүк ыйгарым укуктуу өкүлдөргө сын пикир көбөйүп кетти.
Бирок «Бир Бол» фракциясынан Жогорку Кеңештин депутаты Улукбек Ормонов Мирзахмедов иш билги жетекчи катары тандалды деген ойдо.
- Жалал-Абаддын облус башчысынын кызматтан кеткени мен үчүн күтүүсүз кабар болду, - дейт депутат. - Анын себептерин мен да жакшы түшүнө албай турам. Кадрдык өзгөрүүлөрдү шайлоого байланыштырууга болбойт. Эгер андай болсо бийлик өз талапкерин, өз партиясындагы адамдарды алып келмек. Бул жерде иш билгилигине жана тажрыйбасына карап тандоого жол берилген. Менин жеке пикиримде Нурболот Мирзахмедов Жалал-Абад облусуна жакшы жетекчи катары иштеп берет.
Кыргызстанда саясий адистер жергиликтүү бийлик жетекчилери айрыкча шайлоо алдында өзгөчө мааниге ээ болорун айтып келишет. Ошондуктан алар көпчүлүк учурда өкмөттүн өкүлүн дайындоодо саясий себептер басымдуулук кыларын белгилешет.
