Жапаровдун салтанаттуу кызматка киришүүсүнө даярдык 21-январда башталган.
Бул күнү президенттин милдетин аткарып жаткан спикер Талант Мамытовдун жарлыгы менен инаугурацияны даярдоо жана өткөрүү боюнча уюштуруу тобу түзүлгөн.
Инаугурацияга даярдык үчүн баш калаанын борбордук көчөлөрүнүн жарым сааттай жабылганы автотыгындарды пайда кылып, коомчулуктун сынына кабылган. Андан тышкары инаугурация үчүн 10 млн. сом жумшала турганы да коомчулукта кызуу талаш-тартыш жараткан.
Мындан кийин шайланган президент Садыр Жапаров инаугурация күнү резиденциядан баштап филармонияга чейинки жолду жабууга тыюу салган.
Президенттик аппараттын басма сөз кызматынын жетекчиси Нургазы Анаркулов Жапаров инаугурация күнү Бишкектин жолдорун жаппай, иш-чараны жупуну кылып өткөрүү, 10 миллион сомдук чыгым сарптабоо тууралуу сунуш бергенин кабарлаган.
"Садыр Жапаровдун инаугурациясын уюштуруу тобу аны карап чыгып, ант берүү аземин ошол сунушка жараша өткөрүү боюнча чечим кабыл алат", - деген Анаркулов.
