Казакстандын бир катар жалпыга маалымдоо каражаттары экс-президент Нурсултан Назарбаевдин басма сөз катчысы Айдос Үкибайдын маегин басып чыгышты. Анда ал Назарбаев Коопсуздук кеңештин төрагалыгын "абалды түшүнгөндүктөн, өз эрки менен Касым-Жомарт Токаевге өткөрүп бергенин" айткан.
Буга чейин Айдос Үкибай маалымат каражаттарына Нурсултан Назарбаев Казакстанда экенин, башкалаада Касым Жомарт Токаев менен абалды жөнгө салуу үчүн жолугушууларды өткөрүп жатканын билдирген.
5-январда Казакстандагы Маңгыстау облусундагы газдын кымбатташына каршы нааразылык акциялары башка чоң шаарларга да жайылган. Анын арты тополоң менен коштолуп, абал курчугунда президент Токаев Коопсуздук кеңешинин төрагалыгын өзүнө алганын жарыялаган. 2019-жылы Назарбаев президенттик кызматты тапшырып, бирок Элбасы деген макамды сактап калган. Өмүр бою Коопсуздук кеңешинин төрагасы кызматына бекитилген.
Өлкөдө кырдаал катуу чыңалып турган кезде мурдагы президенттин кай жерде экени тууралуу эч кандай маалымат айтылган эмес.
Кыргызстандын Ички иштер министрлиги Казакстанда башаламандыкка катышы бар деп кармалган кыргызстандык музыкант Викрам Рузахунов тууралуу 9-январда маалымат таратты.
Рузахуновдун кармалышына байланыштуу жагдайлар такталып жатканын, ал жакында концерттик программаны алып баруу үчүн Алматыга чакырылганын билдирди.
Жакындары Алматыга баруу үчүн авиабилет 2021-жылдын 16-декабрында алынып, музыкант 2-январь күнү, саат 20:00дө учуп кеткенин айтып беришкен.
“Аэропортко аны энеси Кундузхан Розахунова менен анын небереси, Бишкекте ИПАМ компаниясында программист болуп иштеген Аскат Сериков коштоп барган. Алар Казакстан Республикасында эч кандай туугандары жоктугун маалымдап, Алматыга концерттик программаларды жана музыкалык фестивалдарга катышууга гана барып жүргөндүгүн билдиришкен», - деп жазылат маалыматта.
Кыргызстандын Ички иштер министрлиги өлкөгө кирип жана чыгып жаткан жарандардын баары укук коргоо органдары тарабынан толук көзөмөлдөнүп жаткандыгын кабарлады.
9-январда Казакстандын "Qazaqstan Ұлттық Телеарнасы" телеканалы башаламандыкка катышы бар деп кармалган, жарандыгы кыргызстандык делген адамдын видеосун тараткан.
Видеодо катуу сабалган адам “белгисиз адамдар” аны 90 миң теңгеге жалдап, Өзбекстан жана Тажикстандын башка жарандары менен кошо Алматыдагы митингге барганын айткан.
Анын Кыргызстандык музыкант Викрам Рузахунов экени белгилүү болду.
Алматыда дагы бир бала окко учту
Казакстандын балдар акыйкатчысы Аружан Саин Алматыдагы окуяларда дагы бир наристенин өмүрү кыйылганын 9-январда билдирди.
"Азаттыктын" казак кызматы Саиндин маалыматына таянып, 7-январдагы атышуулар убагында , саат 19.00дө Алматынын Сейфуллин жана Сатпаев көчөсүндө бараткан машинеге ок тийип, анын ичиндеги төрт жаштагы наристе чарчап калды. Автоунаадагы 9-класста окуган дагы бир секелек реанимация бөлүмүндө жатат.
Буга чейин жергиликтүү жалпыга маалымдоо каражаттары Алматыдагы өлүкканага төрт жашар наристенин сөөгү жеткирилгенин жазып чыгышкан.
Саиндин айтымында, 7-январда, саат 13.30да 8 жаштагы кызга да ок тийип, жараат алган. Балдар акыйкатчысы буга чейин 11 жаштагы баланын окко учканын маалымдаган. Ал эми расмий маалыматта өлкөдө окуяларда өлгөндөр арасында эки бала бар экени, үчөө жаракат алганы айтылат.
Казакстандын Ички иштер министрлиги 9-январда кармалгандардын саны 5969га жеткенин, арасында чет элдиктер бар экенин кабарлады.