Матраимовдун квартирасы боюнча. Ооба, биздин өлкөдө мугалимдер, врачтар турак-жайдан кыйналып атат. Бирок бул 90 квартира эмес. Ошол себептүү, тогуз квартираны УКМКга алууну чечтик. Биздин кызматкерлердин арасында деле жылдап иштеп, бирок үйү жок жүргөндөр бар.
Бандиттер боюнча. Биздин өлкөдө бир да бандит, криминалдык авторитеттин таасири күчтүү болбошу керек. Алар биз сүйлөп, сүйлөп унутат деп ойлошпосун. Андай болбойт. Бандиттер азыр абдан жакшы жашайт. Үйлөрү жакшы, минген машинелери мыкты. Мындан ары андай болбошу керек.
Мен криминалдык топторго эскертүү берем: ишкерлерге кысым көрсөтчү болсоңор, мыйзамдын негизинде жоопко тартыласыңар! Биз ишкерлерге кысым көрсөткөн спортсмендерди, чемпиондорду кармап атабыз. Аларга да кайрыла кетет элем, урматтуу спортчулар силер өлкөнүн туусун көтөргүлө. Ээнбаштык кылбагыла.
Бандиттерди багып келген ишкерлер да жоопко тартылат. Эгер бул өлкөдө кайсы бир кримавторитет болсо ал мыйзам менен жашоого тийиш. Аны каалабаса, түрмөгө отурат же башка өлкөгө чыгып кетсин.
Кримавторитет Кадыр Досоновду кармайбыз. Ал азыр Тажикстанда, бирде Өзбекстанга, бирде бизге өтүп жүрөт. Кармалат ал дагы.
Абдил Сегизбаев айткан Абсатаров эч нерсе чечпейт. УКМКда баарын мен чечем. Албетте, кызматкерлер мага жардам берет.
Ал эми Сегизбаев менен иштеген Чоткарев боюнча. Ага аткезчилик боюнча үч-төрт жыл мурда иш козголгон. Ошол боюнча кармалды. Сегизбаевдин ага тиешеси жок.
Жалил Атамбаев боюнча. Анын баласы бизде иштейт экен. Ага атасынын жоругу үчүн сөгүш бердик. Албетте, үйлөнүү тою болуш керек. Бирок моралдык жагын да кароо керек да. Ушундай кыйын учурда миң кишини чакырып алып той бергени акмакчылык.
Соттор боюнча. Соттордун бир кийген шубасы 5 миң доллар турат. Машинеси 100 миң доллар турат. Кечээ бир судьябыз Дубайга учуп кетиптир үй-бүлөсүн алып. Кечээ кармаган судьянын 20 квартирасы бар экен. Бирок аны декларацияда көрсөткөн эмес. Мындан ары алар декларацияда көрсөткөн үйүндө жашашы керек.
Мен аларга мүлкүңөрдү саткыла, кирешеңерди мамлекетке бергиле деп айтаар экем. Адилеттүүлүк болушу керек да.
Садыр Нургожоев менен жердешчилик болбосун деп сүйлөшкөнбүз.