Кыргызстанда соңку бир сутка ичинде коронавирус жаңы аныкталган 38 адамдын 29у үй карантинде болгон. Үчөө чет өлкөдөн кайтып келгендер.
Ал эми дагы үч киши кайдан жуктурганы белгисиз.
Бул тууралуу 6-июнда саламаттык сактоо министринин орун басары Нурболот Үсөнбаев билдирди. Анын айтымында, үч кишинин вирусту кайдан жуктурганы боюнча изилдөө жүрүп жатат.
Буга чейин COVID-19 пандемиясына каршы күрөш боюнча республикалык штаб Бишкекте базарларда вирус жугузуп алуу коркунучу көп экени байкалып жатканын билдирген. Көпчүлүк жарандар беткап тагынбай жана аралыкты сактабай жатканы айтылган.
Маалыматка караганда, илдет жугузгандардын бири инфекцияны шаардагы үч ири базардын биринен жугузушу мүмкүн. Буга байланыштуу республикалык штаб мэрияга санитардык-эпидемиологиялык чараларды күчөтүүнү сунуш кылган.
Мамлекеттик органдарга жана жергиликтүү бийлик органдарына ата мекендик компанияларга беткаптарды жана антисептиктерди өндүрүүгө көмөктөшүү тууралуу тапшырма берилди.
Ички авиа каттамдагы жүргүнчүлөр аэропорттон тыкыр текшерилет
6-июнда премьер-министрдин милдетин аткаруучу, биринчи вице-премьер-министр Кубатбек Боронов «Манас» аэропортунун ички аба каттамдарды жандандырууга даярдыгын көрдү. Бул тууралуу өкмөттүн басма сөз кызматы маалымдады.
Аэропорт кызматкерлери жүргүнчүлөрдү текшерүү тартиби тууралуу айтып беришти. Ага ылайык, «Манас», «Ош» жана «Ысык-Көл» аэропортторунун имаратына билети бар жүргүнчүлөр, майыптарды коштогондор гана киргизилет. Узатуучу жана тосуп алгандар үчүн өзүнчө орун даярдалган.
Аэробекеттерге кирүүдө бардык жүргүнчүлөр жана жүк милдеттүү түрдө дезинфекциялоочу туннелден, термометрдик көзөмөлдөн өтөт жана адамдардын дене табын тепловизордук камералар текшерет. Сөзсүз түрдө беткап тагынып, аралыкты сактоо зарыл. Учуп келгенде дагы ушундай эрежелер болот.
Премьер-министринин милдетин аткаруучу, биринчи вице-премьер-министр Кубатбек Боронов жүргүнчүлөрдү текшерүүдө бардык талаптар аткарылышы керек экенин белгилеп, билет баасы боюнча дагы маселе көтөрдү.
“Билет баасынын жогору экени тууралуу жарандардын кайрылуулары түшүүдө. Тармактык органдар бул маселени иштеп чыгып, жөнгө салышы керек”, - деди Боронов.
4-июнда Жарандык авиация агенттигинин жетекчиси Курманбек Акышев өкмөттүн чечимине ылайык, 5-июндан тарта ички каттамдар кайрадан жандандырыларын билдирген. Ал «Тез Жет» авиакомпаниясы 7-8-июндан баштап каттамдарын ишке киргизерин айткан.
ДССУ беткап боюнча эрежесин өзгөрттү
Дүйнөлүк саламаттык сактоо уюму (ДССУ) беткап тууралуу мурдагы эрежесин өзгөртүп, коронавирус көп жайылып жаткан аймактарда жана социалдык обочолонуу эрежесин сактоо мүмкүн болбогон жерлерде беткап тагынуу зарыл экенин билдирди.
Уюм 5-июндагы билдирүүсүндө беткапты вирустун жайылышын алдын- алган ыкмалардын бири деп мүнөздөдү. Ошол эле учурда бетти жаап жүрүү менен гана COVID-19дан толук сактануу мүмкүн эмес экенин эскертти.
Буга чейин Дүйнөлүк саламаттык сактоо уюму медицина кызматкерлерине, COVID-19га чалдыккандарга жана аларга кам көргөндөргө гана беткап тагынууну сунуштаган. Ошентсе да бир топ өлкөлөр жарандарын эл көп топтолгон жайларда жана коомдук транспорттордо беткап тагынып жүрүүгө милдеттендирген. ДССУ кеминде үч катмардан турган беткаптар натыйжалуу болорун кошумчалады.
Декабрь айынан бери дүйнө жүзүндө коронавируска чалдыккандардын саны 6 миллион 700 миңден ашты. Өпкөнү сезгенткен бул илдет дүйнөдө 400 миңдей кишинин өмүрүн алды.
Коронавирус тууралуу дүйнөдөгү соңку кабарлар
- Ирандын президенти Хасан Роухани үйлөнүү тойлордун айынан өлкөдө басаңдап калган коронавирус кайра күчөгөнүн билдирди. Ал вирустун экинчи толкуну болот деген коркунучка карабай, экономиканы кармап туруу керектигин белгиледи. Иран апрель айынын ортосунда карантин чараларын жумшарткан. Февралда бул өлкөдө оору күчөгөн. 4-июнда оору жуккандар 3574 адам деп катталып, февралдагы көрсөткүчтөн көп болду.
- Индияда COVID-19 жуккандардын саны өстү. Бул өлкөнүн Саламаттык сактоо министрлиги 9 887 жаңы учур катталганын маалымдады. Ооругандардын жалпы саны 236 657. Илдет жуктургандардын көбү чоң шаарларда иштеп, карантин маалында аймактарга кайткан ички мигранттар.
- Түштүк Корея COVID-19 жуккан 51 жаңы учур тууралуу кабарлады. Илдет негизинен эл жыш жашаган райондордон чыгууда. Ооругандардын 34ү медициналык каражаттарды саткан Richway компаниясынын сатуучулары жана курьерлери. Саламаттык сактоо министринин орун басары компаниянын жумушчулары үчүн кабатыр болуп жатканын билдирди. Анын айтымында, Richway компаниясынын сатуучуларынын көбүн 60 жаштын тегерегиндегилер түзөт.
- Кытайдын Маданият жана туризм министрлиги жарандарын Австралияга барбай турууга чакырды. Мекеме мындай кадамын бул өлкөдө коронавирустун тарашына кытайларды күнөөлөгөндөр көп экендиги менен түшүндүрдү. Бирок Австралиянын премьер-министри Майкл Маккормак бул эскертүү жалган маалыматка негизделгенин айтты жана анын өлкөсүндө чыдамкайлык, башкаларга карата сый-урмат күчтүү экенин белгиледи.
- Калифорнияда кино тартуу иши 12-июнда жанданат. Disney, Netflix, Warner Bros, NBCUniversal кинокомпаниялары профсоюз менен биргеликте иштеп чыккан эрежеге ылайык, актерлор ишке кайтып келгенге чейин тесттен өткөрүү, оорунун башка белгилерин ыкчам аныктоо жана бир катар коопсуздук эрежелерин сактоо иштери жөнгө салынышы шарт.
- Бразилиянын президенти Жаир Болсонару ДССУдан чыгарын айтты. Болсонару Дүйнөлүк саламаттык сактоо уюмун Covid-19га каршы гидроксихлорохинди сыноону токтоткону үчүн айыптады. «АКШ ДССУдан чыкты, биз дагы ушул мүмкүнчүлүктү карап атабыз. ДССУ идеологиялык мамилеси жок иштеши керек, болбосо биз кетебиз», – деди Болсонару. Бразилия дүйнөдө коронавирустан өлгөндөрдүн саны жагынан АКШ жана Британиядан кийинки орунда турат. Өлкөдө баш-аягы 35 миңдей адам жугуштуу илдеттен көз жумду.