АКШдагы Жонс Хопкинс университетинин маалыматына ылайык, 15-майга карата дүйнө жүзүндө коронавирус илдетине чалдыккандардын саны 161,9 млн. адамды түздү. 3 млн. 357 642 киши көз жумду.
COVID-19 вирусун жуктургандардын саны жагынан алдыңкы орунда АКШ турат. Америкада 32 млн. 894 739 адам илдетке чалдыккан. 585 миңден ашуун адам оорудан улам жарык дүйнө менен кош айтышты.
Экинчи орунда турган Индияда 24 млн. 372 907 адам коронавируска чалдыкканы расмий кабарланууда. Өлкөдө 266 207 адам илдеттен көз жумду.
Ал эми Бразилияда жалпы ооруга чалдыккандардын саны 15 млн. 519 525 адамга жетти. 432 628 киши вирустан каза болду.
Дүйнөлүк саламаттык сактоо уюму коронавирус пандемиясынан быйылкы курмандыктар былтыркыга караганда арбын болорун эскертти.
Коронавирус алгачкы аныкталган былтыркы март айынан бери Кыргызстанда коронавируска чалдыккандардын саны расмий 100 249 адамга жетти.
Саламаттык сактоо жана социалдык өнүгүү министрлигинин 15-майдагы маалыматына ылайык, жалпы 93 302 адам сакайды. Пандемия башталгандан бери вирустан 1695 адам көз жумду.
Акыркы суткада 404 адамга коронавирус жукканы лабораториялык жактан тастыкталды. Анын ичинен басымдуу бөлүгү Бишкекте – 294, Ош шаарында – 4, Чүй облусунда – 65, Ош облусунда – 2, Таласта – 1, Нарында – 9, Ысык-Көлдө – 20, Жалал-Абадда – 9 адам ооруга чалдыккан. Баткен облусунда коронавируска чалдыккандар расмий катталган жок.
15-майга карата оорудан 349 адам сакайып чыкты. 8 адам көз жумду, анын ичинен төртөө Бишкекте, үчөө Чүйдө, бирөө Талас облусунда.
Кыргызстанда COVID-19 вирусуна чалдыккан алгачкы үч адам 2020-жылы 18-мартта аныкталган. Былтыр июнь-июль айларында вирустун жугуу темпи жогорку чекке жетип, илдеттен көз жумгандардын саны кыска аралыкта кескин көбөйгөн.
Ооруканаларда орун табылбай, дарыканада кезек күткөндөрдүн саны көбөйгөн. Ыктыярчылардын жардамы менен жер-жерлерде күндүзгү стационарлар иштей баштаган.
Орусиянын борбору Москвада өткөн суткада 4 миңден ашык адамдан коронавирус аныкталды. Бул быйыл январдан берки эң жогорку көрсөткүч. Бир күндө 60 бейтап каза болду.
Орусияда болсо соңку суткада 9500дей киши вирус жугузуп алганы белгилүү болгон. Бул 20-марттан берки максималдуу көрсөткүч. Дарыгерлер мындай тенденция май айындагы майрамдар учурунда көпчүлүк көчөгө чыгып, коомдук транспортту колдонгону себеп болушу мүмкүн экенин айтышууда.
Пандемия башталгандан бери Орусияда 5 миллиондон ашык адам вирус жугузду. Каза болгондордун расмий саны 115 миңден ашты. Медиктер жана демографтар оору жугузгандар жана каза болгондордун чыныгы саны мындан көп болушу мүмкүн экенин айтууда.
Акыркы бир сутка ичинде Кыргызстанда коронавирустан алты бейтап каза болду. Алардын төртөө Бишкекте, бирөө Чүйдө, дагы бири Ысык-Көл облусунда катталды. Муну менен илдеттен каза тапкандардын саны 1687 кишиге жетти.
Коронавируска каршы республикалык ыкчам штабдын 12-майдагы маалыматына ылайык, соңку бир суткада 200 кишиден вирус жаңы аныкталды. Мурда ооруп жаткандардын ичинен 235 киши сакайып чыкты.
Коронавирус пандемиясы башталгандан бери Кыргызстанда 99 845 киши вирус жугузуп алды. Анын 92 953ү сакайып чыкты.
Учурда 1758 киши стационарда дарыланып жатат. Алардын ичинен 86 бейтаптын абалы өтө оор экени кабарланды.
Соңку күндөрү COVID-19 илдетинен көз жумгандар көбөйүп, май айынан башынан бери эле 83 бейтап жашоо менен кош айтышкан.
Кыргызстанда Кытайдын "SinoPharm" жана Орусиянын "Спутник V" вакциналары менен эмдөө жүрүп жатат. Расмий маалыматка ылайык, ушул күндөрү 50 миңден ашуун киши вакцина алды.
Кыргызстанга келген Кытай препараты 75 миң адамга, орус препараты 10 миң адамга жетет. Кошумча вакцина алуу боюнча сүйлөшүүлөр жүрүп жатат. Өкмөт эл аралык COVAX программасынын алкагында британ-швециялык "AstraZeneca" вакцинасы да келерин билдирген.
12-майда саламаттык сактоо жана социалдык өнүктүрүү министри Алымкадыр Бейшеналиев Дүйнөлүк банк Кыргызстандагы коронавируска каршы күрөш үчүн 20 миллион доллар бере турганын билдирген. Министрдин айтымында, бөлүнгөн каражатка Кыргызстан кытай вакцинасын сатып алат.