Бишкектеги Ак үйдүн алдында башкалаадагы жүзгө чукул медициналык кызматкер тынчтык акцияга чыгышты.
Алар коронавирус пандемиясынын шартында иштегени менен "өкмөт убада кылган кенемте берилбеди, айлыктар көтөрүлгөн жок" деп нааразылык билдиришти. Акцияга чыккандардын бири Кемелбек Мамыров ооруган кызматкерлердин баарына кенемтени тегиз берүүгө бийликти чакырды.
Чогулгандардын айрымдары "Өкмөттүн компенсация төлөө убадасы аткарылган жок!", "Медайымдарга да 1-апрелден тартып 100% айлык!" деген жазууларды көтөрүп турушту.
Президентке, өкмөткө кайрылган медайымдар айлыкты 50% эмес, 100% көбөйтүүнү суранышты. Алар оор шартта иштеген учурда элдин кол салуусуна кабылган учурларын эске салып, кол тийбестик тууралуу маселени да көтөрүштү.
Мындан тышкары коронавирус жугузуп алган медкызматкерлерге кенемте туура каралып, туура бөлүштүрүлбөй жатканын айтышып, муну чечип берүүнү талап кылышты.
Уюштуруучулардын айтымында, акцияга негизинен "кызыл зонада" иштегендер келди. Нааразы тарап өкмөткө жана президентке кайрылуу жолдошту.
Акыркы күндөрдө Кыргызстанда коронавирус жугузгандар, андан кайтыш болгондор көбөйүп жатат. Илдет аныкталган медкызматкерлер да күн сайын катталууда.
Дүйнөлүк саламаттык сактоо уюмунун Кыргызстандагы өкүлчүлүгү 16-апрелде өлкөдө коронавирусту дарылоодо уу коргошундун колдонулушу тууралуу билдирүү таратты.
Анда дүйнөдө препараттарды иштеп чыгууда клиникалык изилдөөлөр маанилүү экени, анын натыйжалуулугу менен коопсуздугу иликтене турганы айтылат.
Ошондой эле уу коргошундун коронавирусту дарылоодо натыйжалуулугу тууралуу ДССУнун маалыматы жок экени белгиленген. Уюмдун билдирүүсүндө, мындай маалымат алуу үчүн чөптүн фармакологиялык касиетин эл аралык стандарттарга ылайык иликтеп чыгуу керек.
Мындан тышкары аталган уюм COVID-19дун белгилери байкалганда өз алдынча дарыланбай, токтоосуз түрдө дарыгерлерге кайрылоону сунуштады. Аралыкты сактоого, баткап тагынууга, колду бат-баттан жууп, тазалоочу, вирус-бактерияларга каршы каражаттарды колдонуу, үйдү желдетип туруу, оорунун белгилери байкалганда тест тапшырууга элди чакырды.
Саламаттык сактоо жана социалдык өнүгүү министри Алымкадыр Бейшеналиев 16-апрелде журналисттерге талкууга түшкөн уу коргошун тууралуу маалымат берди.
Анын айтымында, уу коргошун ушул кезге чейин Кыргызстандагы ооруканаларда жаткан 300 бейтапка берилип, байкоо жүргүзүлдү.
"Кыргызстандын бардык жеринде ыктыярдуу түрдө колдонулуп жатат. Бирөө ичкенден кийин эртеси издеп жатат. Алардын баарынын абалы жакшырган. Садыр Жапаров уу коргошун тууралуу мурдагы президент Жээнбековго кайрылып, ал укпай койгондо мага "сен дарылап көр" деп айткан. Мен туугандарымды дарылагам".
Бейшеналиев журналисттердин алдында уу коргошундун тундурмасын ичип, анын зыянсыз экенин айтты. Президент экөө кайнатманы даярдап жатканын белгиледи. Дарыгерлерди чакырып, аларга дарылоону үйрөтүп жатканын кошумчалады.
15-апрелде президент Садыр Жапаров Кыргызстандын дарыгерлери коронавирустан 2-3 күндө айыктырган ыкма тапканын жарыялаган. Көп өтпөй анын социалдык тармактагы расмий баракчаларына бир нече киши атайын аппараттын жардамы менен бөтөлкөлөргө кайнатманы куюп жатканы тартылган видео жарыялаган. Анын сыртында "Уу коргошун" деген жазуу бар.
Кыргызстанда уу коргошунду рак жана башка ооруларды дарылоодо табыптар колдонуп келген. Бирок ага медицинада тыюу салынган. Дүйнөлүк саламаттык сактоо уюму Кыргызстандын бийлиги айткан ыкма тууралуу комментарий бере элек. Социалдык тармактардын колдонуучулары өлкөдө уу коргошун ичип каза болгондор бар экенин жазып жатышат.
Кыргызстанда жергиликтүү кеңештерге шайлоо жана президенттик башкарууга ыктаган Баш мыйзамдын жаңы долбоору боюнча референдумдан кийин коронавирус жугузгандар кескин көбөйдү.
Бул тууралуу саламаттык сактоо жана социалдык өнүгүү министри Алымкадыр Бейшеналиев 16-апрелдеги брифингде билдирди.
"Шайлоо өттү. Шайлоодон кийин дайыма коронавирус көбөйө баштайт. Себеби, дарыгерлердин айтканын эч ким укпай, беткап тагынбай, социалдык аралыкты сактабай, эл көп жерлерге чогулушуп, күндөн-күнгө оору күчөп баратат. Бир жарым, эки ай мурда Чүй, Бишкек, Ысык-Көл облустарынан башка аймактарда ооругандардын саны бир ай, эки айлап жок болуп калган. Шайлоо өткөндөн кийин бардык облустарда ооруй башташты. Кечээ 305 киши ооруп калды", - деди Бейшеналиев.
16-апрелге карата республика боюнча вирус дагы 230 кишиден табылды. Бир күн мурда 305 кишиден расмий аныкталып, сентябрдан берки эң көп көрсөткүч болгон.
Акыркы күндөрдө илдет расмий аныкталгандар айыккандардан кыйла көп катталууда.