Акыркы бир сутка ичинде Кыргызстанда COVID-19 илдетинен дагы төрт киши каза болду.
Коронавируска каршы күрөш боюнча республикалык штаб билдиргендей, алардын үчөө Бишкекте, бирөө Чүй облусундагы ооруканада жаткан.
Ушуну менен өлкөдө коронавирус пандемиясы башталган 2020-жылдын март айынан бери андан каза болгондор 1532ге жетти.
12-апрелге карата республика боюнча вирус дагы 227 кишиден табылып, сентябрдан берки эң көп көрсөткүч болду.
Алардын эң көбү Бишкек шаарында (141), андан кийин Чүй облусунда (64), Ысык-Көл облусунда (9), Ош шаарында (6), Ош облусунда (2), Баткенде (2), Талас, Нарын, Жалал-Абад облустарында бирден учур катталды.
Пандемияда илдетти жугузуп алгандар 90 599, айыккандар 86 152 кишини түздү. Бир күн аралыгында 124 бейтап айыкты.
13-апрелде башталуучу ыйык Рамазан айынын босогосунда бир катар мусулман мамлекеттеринде коронавирус илдети тездик менен жайылгандыгы санааркоо жаратууда.
Пакистан бийликтери жугуштуу илдеттин жайылышын токтотуу үчүн 10-апрелден баштап шаарлар аралык унаа каттамдарын чектеп жаткандыгын билдирди.
10-апрелде Иран 257 шаарда 10 күндүк чектөөлөрдү киргизгендигин жарыялады. Бул шаарларда бардык парктар, ресторандар, сулуулук салондору, соода борборлору жана китеп дүкөндөрү жабылды.
Түркия акыркы 10 күндүн ичинде “COVID-19” илдети жуккан рекорддук көрсөткүчкө кабылды. Жугуштуу оорунун кескин жайылышы Түркияны жаңы чектөөлөрдү киргизүүгө мажбур кылды. Өлкөдө, мисалы, дем алыш күндөрү карантин киргизилет жана рамазан айында кафе-ресторандар жабык болот.
Индонезиянын борбору Жакартада орозо айында коронавируска каршы этият болуу шарттарын сактоо менен кечки ооз ачуу учурунда иштеген ресторандар саат 21:00де жабылууга тийиш.
6-апрелде Ирандын саламаттыкты сактоо министринин орун басары Ираж Харирчи мырза “COVID-19” илдетине каршы ирандык илимпоздор тарабынан иштелип жаткан тогуз вакцина долбоорунун ичинен бир долбоору жакынкы 40 күндүн ичинде калайыкты эмдөө үчүн даяр болот, деп алдын ала шардана кылды.
Соңку бир суткада COVID-19 инфекциясын жугузуп алган үч киши каза тапты.
Анын экөө Бишкек шаарынан болсо, бирөө Чүй облусунан.
Коронавируска каршы штабдын маалымдашынча 10-апрелде республика боюнча вирусту жугузуп алган 208 киши катталды.
Алардын басымдуусу Бишкек шаарында жана Чүй облусунда.
- Бишкек - 128
- Ош шаары - 1
- Чүй облусу – 66
- Ош облусу - 2
- Талас облусу - 0
- Нарын облусу - 2
- Ысык-Көл облусу – 8
- Жалал-Абад облусу – 0
- Баткен облусу - 1
Ушуну менен COVID-19 U07.1 жана U07.2 вирусу катталган өткөн жылдын март айынан бери аны жугузуп алгандардын саны 90 019 кишиге жетти.
Штаб акыркы суткада 105 киши айыкканын маалымдады. Ал эми 833 адам ооруканада жатат. Бейтаптардын ичинен 27 адамдын абалы өтө оор. 193 адам оор абалда жатат.
587 адамдын абалы орто оордукта, 26 бейтап канааттандырарлык абалда.
Индияда вакцинанын таңкыстыгы орун алууда. Мумбай мегаполисинде коменданттык саат жана дем алыш күндөрү карантин жарыяланды. Өлкөдө коронавирусту жугузуп алуу көрсөткүчү жана бул илдеттин айынан күнүмдүк өлүмдөрдүн саны беш айдан берки эң жогорку чекке жеткени маалымдалды.
Калкынын саны боюнча дүйнөдө экинчи орунда турган бул өлкөдө март айынын акыркы күндөрүнөн бери бир миллиондон ашык киши коронавирусту жаңыдан жугузуп алды. Индияда күнүнө 500дөн ашуун киши өлүмү катталууда, бирок өлүм-житимдин чыныгы саны мындан да жогору деп жоромолдонуп жатат.
Борбордук өкмөт экономикалык кыйынчылыктардан чочулап, экинчи жолу жалпы карантин киргизүүдөн баш тартууда, бирок айрым штаттардын жергиликтүү бийликтери өз аймактары үчүн чектөөлөр киргизип жатышат.
Махараштра штаты жана анын борбору Мумбай 10-апрелде карантин киргизди. Мында дем алыш күндөрү ресторандар жабылып, бештен ашуун кишинин чогулушуна тыюу салынды.
Махараштра штатынын 125 миллиондуу калайыгы апрелдин аягына чейин ар бир дем алыш күндөрү карантиндик чектөөлөргө кабылат. Бул аймакта кишилер тамак-аш, дары-дармек же өтө зарыл саякат үчүн гана көчөгө чыгууга мүмкүнчүлүк алышат.