Танзаниянын президенти Жон Магуфули 61 жашында каза болду.
Бул тууралуу өлкөнүн вице-президенти мамлекеттик телеканалдан жарыялады. Магуфули март айынан башынан бери эл алдына чыкпай калган. Учурда оппозициянын өкүлдөрү президент коронавирус жуктуруп алып, коңшу Кенияда дарыланып жатканы тууралуу маалымат тараткан.
Танзаниянын өкмөтүнүн өкүлдөрү "анын саламаттыгы жайында, элге чыкпай иштеп жатат" деп айтып келген.
Жон Магуфули коронавируска байланыштуу өлкөсүндө карантин киргизбей, беткап тагынуудан баш тарткан.
Ал COVID-19га каршы эмдөөнү келекелеп, дубаларга гана ишенүү керектигин айтып келген. Президент мындай позициясын “чет элдик илимге” ишенбей турганы менен түшүндүргөн. Танзанияда коронавирус жуктуруп алгандардын расмий статистикасы жүргүзүлгөн эмес.
"The Financial Times" басылмасынын жазышынча, президенттин ооруп жатканы боюнча маалымат тараткан төрт адам камакка алынды. Оппозиция Магуфули өткөн аптада эле каза болушу мүмкүн деп шек саноодо. Өкмөт болсо президент жүрөк оорусунан улам дүйнө салды деген маалымат таратты.
Танзаниядагы соңку маалда коронавирустун мутацияланган түрү жайылып жатканы кабарланган. Өлкөнүн автономдук аймагы саналган Занзибар пандемия маалында туристтерди кабыл алган. Февралдын башында бул аймактын жетекчилеринин бири коронавирустан улам каза болгон.
Кыргызстанда коронавируска байланыштуу абал курчуп кетсе дары-дармек менен медициналык кызматкерлер үчүн жеке коргонуучу каражаттар эки айга жетет.
Бул тууралуу саламаттык сактоо жана социалдык өнүгүү министринин орун басары Мадамин Каратаев 18-марттагы брифингде билдирди.
"Жасалма дем алдыруучу жабдуулар, ооруну дарылоого керектүү аппараттардын баары жетиштүү. Эгер абал курчуп кетсе биз 2020-жылдагыдай мектеп, клубдарга стационар ачпай, ооруканалардын баарында вирус болгондорду дарылоо үчүн даярданып жатабыз".
Бүгүн - 18-мартта Кыргызстанда коронавирус катталганына бир жыл болду.
Жалпысынан оору жугузуп алгандардын расмий эсеби - 87 143 адам. Анын 84 031и айыгып чыкты.
Бишкек шаарындагы жугуштуу оорулардын клиникасына 2020-жылдын 18-мартынан бери жети миңден ашуун адам коронавирус менен ооруп түшкөн.
Министрликтин жаңы эсеби боюнча пандемия башталган 2020-жылдын март айынан тартып оорудан кайтыш болгондордун жалпы саны 1485 кишиге жетти.
Кыргызстанда коронавирус катталганына бир жыл болду.
Бул аралыкта оору 3400дөн ашуун медициналык кызматкерге жугуп, 104ү каза болду.
Бул тууралуу Саламаттыкты сактоо жана социалдык өнүктүрүү министринин орун басары Мадамин Каратаев 18-марттагы брифингде маалымдады.
Оору жуктурган жана андан каза болгон медициналык кызматкерлерге кенемте төлөп берүү боюнча министрликке 2800дөй арыз түшкөн. Ооруп айыккан 1500дөн ашуун медициналык кызматкерге 200 миң сомдон кенемте берилди. Ал эми каза болгон медиктердин үй-бүлөсүнөн 60 арыз түшүп, 32 үй-бүлөгө бир миллион сомдон кенемте төлөндү. Жалпы кенемте төлөөгө 185 миллион сом жумшалган.
Каратаев кенемте төлөөнүн тартиби 2021-жылдын 11-январынан тарта өзгөргөнүн, мындан ары вирус жугузуп алган дарыгерлерди изилдеп, чечим чыгаруу милдети ооруканадагы жетекчиликке берилгенин айтты. Маалыматка караганда вирус жугузуп алгандар үчүн кенемте 75 миң сомду түзөт.
Бишкек шаардык ички иштер башкармалыгынын убактылуу кармоочу жайында 66 кишиден пневмония, 11 адамдан коронавирус аныкталды.
Бул тууралуу Кыйноонун алдын алуу боюнча улуттук борбордун өкүлдөрү Бишкектин жана Чүй облусундагы убактылуу кармоочу жайларды кыдырып чыкканда белгилүү болгон.
Аталган борбор билдиргендей, адистер камералардын толуп калганына, кармалган айрым адамдар полдо жаткан учурларга күбө болушкан. Мекеме убактылуу кармоочу жайда отургандардын жугуштуу ооруларды, коронавирус жугузуп алуу коркунучу жогору экенин эскертти.
"Бардык убактылуу кармоочу жайларында медицина кызматкеринин штаты жок. Шаардык милициядагы жалгыз фельдшер өзү да пневмония жугузуп алган. Пандемияда компенсация алган эмес", - деп жазылган маалыматта.
Ошондой эле жабык жайларда кармалгандарга катаал мамиле жасалары, аларга таза суу тургай жуунганга суу да берилбей турганы, айрымдар кыйноого кабылып жатканы белгиленген.
Чүй облусунун Жайыл райондук милициясында кармалгандарга бир күндө бир эле маал тамак берилип жатканын сындаган.
Кыйноонун алдын алуу борбору 16-мартта «Бир Дүйнө Кыргызстан» укук коргоо уюму менен биргеликте убактылуу кармоочу жайлардагы абалды талкуулады. Ага ИИМ, Акыйкатчы институту, ЖАМК, Саламаттык сактоо жана социалдык өнүгүү, Юстиция министрликтеринин, Башкы прокуратуранын өкүлдөрү катышты.
ИИМ Кыйноонун алдын алуу боюнча борбордун маалыматына комментарий бере элек.
Кыргызстанда убактылуу кармоочу жайлардагы шарт өтө начар экени көптөн бери айтылып келет.
Кыргызстанда соңку бир сутка ичинде 4095 кишинин коронавируска карата ПЧР анализи изилденди.
Оору Чүй облусунда дагы бир бейтаптын өмүрүн алды.
COVID-19га каршы күрөшүү боюнча республикалык штаб 17-мартта билдиргендей, бир суткада вирус 55 кишиден жаңы аныкталды.
Министрликтин жаңы эсеби боюнча пандемия башталган 2020-жылдын март айынан тартып оорудан кайтыш болгондордун жалпы саны 1485 кишиге жетти.
Пандемияда оору жугузуп алгандардын расмий эсеби 87 045 киши болду. Анын 83 980и айыгып чыкты.
Азыр 333киши ооруканаларда жатат. Анын 18инин абалы өтө оор, 77 кишинин акыбалы оор деп бааланган. 236 бейтаптын абалы орто оордукта. 307 адам үй шартында дарыланууда.