Украинада коронавирус ылдам темпте тарап жатат. 6-мартка карата соңку бир суткада 9 миңден ашуун адамдан COVID-19 илдети аныкталды.
"Интерфакс" агенттиги саламаттык сактоо министри Максим Степановго таянып кабарлагандай, бир күндө 156 бейтап көз жумду.
Соңку бир аптада Украинада ооруга чалдыккандардын саны күн сайын 5 миңден 10 миңге чейин жетип турду.
Пандемия башталгандан бери бул өлкөдө 1 млн. 400 миңдей адамга коронавирус жугуп, 27 миңге жакыны көз жумду. 1 млн. 194 миңдейи айыкты.
АКШдагы Жон Хопкинс университетинин маалымат базасы көрсөткөндөй, дүйнөдө коронавирус жуккандардын саны 6-мартка карата 116 миллиондон ашты. Алардын 2 млн. 580 миңден көбү жашоо менен кош айтышты.
Бразилияда 3-мартта COVID-19 илдетинен 1 миң 910 киши каза тапты.
Муну менен коронавирустан көз жумгандардын жалпы саны өлкөдө 260 миңге жетти. Бразилия өлүм-житим жагынан АКШдан кийин экинчи орунда турат. 44 миллион калкы бар Сан-Паулу штатында карантин киргизилди. Коронавирустун Бразилиядан тараган штаммын адистер өтө кооптуу деп сыпатташат.
Түндүк Америкада инфекция жуккандар дагы деле көп болгону менен жыл башынан бери сандар төмөндөдү. Кошмо Штаттарда вирусту жугузуп алгандардын күнүмдүк көрсөткүчү январдын ортосуна салыштырганда 70 процентке, өлгөндөр 40 процентке азайды.
Президент Жо Байден өлкө майдын этегине чейин бардык чоң кишилерге жетчүдөй көлөмдө вакцинага ээ болушу керек деп билдиргендин эртеси эле Техас, Миссисипи өңдүү штаттардын бийликтерин сындады. Буга чейин ал жерлерде чек аралар ачылып, беткаптарды милдеттүү тагынуу эрежеси алынып салары жарыяланган.
Ал тапта Германияда карантиндик чаралар 28-мартка чейин узартылмай болду. Ошол эле маалда айрым чектөөлөр алынууда. Алсак, эми беш кишиге чейин чогулууга уруксат берилет, кээ бир дүкөндөр менен тейлөө кызматтары ачылмакчы.
АКШнын президенти Жо Байдендин 1,9 триллион долларлык коронавирустук жардам көрсөтүү пакети Конгресстин Өкүлдөр үйүндө жактырылды. Мыйзам долбоору 27-февралда таңга жуук өткөн добуш берүүдө 219–212 катышында кабыл алынды. Бир дагы республикачыл конгрессмен мыйзам долбоорун колдоп добуш берген жок.
Мыйзам долбоору эми Демократиялык партиянын көзөмөлүндөгү Сенатка жөнөтүлөт. Сенат буга чейин эле негизги маселеге – АКШнын минималдык эмгек акысын эки эсеге көбөйтүп, саатына 15 долларды түзүү сунушуна бөгөт койгон.
Байден президенттикке талапкер кезинде өлкөнүн минималдык айлык акысын саатына 7,25 доллардан 15 долларга чейин көтөрүү боюнча үгүт иштерин жүргүзгөн.
Жардам пакети көпчүлүк америкалыктарга тикелей 1400 долларлык чектерди берүү жана, ошондой эле, вакциналарды жеткирүүнү күчөтүү, мектептердин ачылышына жардам берүү жана штаттар менен жергиликтүү өз алдынча башкаруу органдарын каржылоо үчүн миллиарддаган доллар бөлүү чараларын өзүнө камтыйт.
Ошондой эле, бул пакет жумушсуздук боюнча жөлөк пул төлөөнү жана ижара акысын төлөй албай кыйналып жаткан миллиондогон кишилерди ижарадагы батирлеринен чыгарууга мораторийди узартат.
Байден пакет коронавирус шартында оор абалда калган америкалыктарга көмөк болот деди. Бирок республикачылар план өтө эле ашыкча болуп калды жана ага пандемия менен эч байланышпаган саясат да киргизилген деп эсептешет.
Бишкек мэриясынын Билим берүү башкармалыгы окуучулардын ата-энелерине кайрылып, мектептерди толук ачуу маселесин чечүү үчүн убакыт керектигин, ага чейин чыдамкайлык талап кылынарын балдарга түшүндүрүүнү өтүндү.
27-февралда мекеменин басма сөз кызматы окуучулар аралыктан окууга каршы нааразылык акциясын уюштурууга камынып жатышканы тууралуу маалымат бар экенин билдирди.
Маалыматта мэрия "онлайн окуунун балдар үчүн да, ата-энелер үчүн да оордугун түшүнүп турганын, бирок балдардын ден соолугу, алардын коопсуздугу биринчи орунда экендигин" билдирди.
Расмий маалыматка караганда, бүгүнкү күндө борбор калаада эки мектеп коронавируска байланыштуу карантинге жабылып турат.