Шайлоого ЕККУ болгону 20 байкоочусун жиберген. Себеби, уюмдун өкүлү билдиргендей, атаандаштык болбогондуктан толук кандуу миссия жөнөтүүнүн зарылчылыгы жок деген чечим кабыл алынган. Укук коргоо уюмдары болсо, өлкөдөгү адам укуктарынын абалын сындап келишет.
Борбордук шайлоо комиссиясынын төрагасы Мирза-Улукбек Абдусаламов шайлоо участкалары ачылгандан жети саат өткөндөн кийин добуш бергендердин саны 51 процентке жеткенин айтып, шайлоо өттү деп расмий жарыялады.
Парламенттин - Олий Межлистин төмөнкү, мыйзам чыгаруу палатасындагы 150 мандат үчүн 520 талапкер ат салышты. Алар Либерал-демократиялык, Элдик-демократиялык, Демократиялык Улуттук кайра жаралуу, Социал-демократиялык "Адилет" партиялары тарабынан көрсөтүлгөн. Тактап айтканда, талапкерлер 150 орундун 135и үчүн гана күрөштү. Анткени он беш орун атайын Өзбекстандын Экологиялык кыймылы үчүн бекитилип берилген.
Бул партиялардын бардыгы президент Ислам Каримовдун саясатын колдошот.
Өзбек мыйзамдары боюнча саясий партиялар жана алардын талапкерлери үгүт өнөктүгүн бюджеттен Борбордук шайлоо комиссиясы аркылуу ажыратылып берилген каражаттын эсебинен гана жүргүзүшөт
Өзбекстанда, расмий маалыматка ылайык, 20 миллиондон көп шайлоочу катталган.
Шайлоо комиссиясы өнөктүккө 300дөн ашуун эл аралык байкоочу көз салганын билдирди.
Европадагы коопсуздук жана кызматташтык уюму толук кандуу атаандаштык жок болгондуктан, байкоочулардын чакан тобун гана жөнөтүүнү чечкен.
Өзбекстан бийлиги көп жылдардан бери адам укуктарын бузуп, оппоненттерин куугунтуктагандыгы үчүн эл аралык укук коргоо уюмдарынын сынына кабылып келатат.
Декабрдын башында Нью-Йоркто жайгашкан "Хьюман Райтс Уотч" уюму расмий Ташкентти Конституция күнүнүн урматына жарыяланган мунапыска саясий себептерден улам камалган бардык туткундарды камтууга үндөдү.
Уюм ошондой эле өткөн сентябрда саясий жүйөдөн улам камакка алынып, абакта каза болгон 37 жаштагы Нилуфар Рахимжонованын өлүмүн жакшылап иликтөөгө чакырган.
- Атамдын "эң өкүнүчтүүсү Өзбекстанда саясий туткун болуу тазалыктын бир мөөрү болуп калды" деп айтканы бар. Сен саясий туткун болсоң, демек чынчыл адамсың. Тилекке каршы, Өзбекстандагы абал азыр ушундай, - деген октябрда АКШнын Хельсинки комиссиясынын пресс-конференциясында абактагы журналист Мухаммад Бекжановдун кызы Айгүл.
Шайлоо алдында Өзбекстандагы окуяларга адистешкен германиялык uznews.net интернет сайты жабылып калды. Анын алдында сайттын башкы редактору Галима Бухарбаеванын компьютери жана электрондук почтасы хакерлердин чабуулуна туш болгон. Бухарбаева ал үчүн Өзбекстандын жашыруун кызматын айыптоодо.
Анын компьютеринен алынган маалыматтар, анын ичинде Өзбекстандын ичиндеги журналисттерге төлөнгөн калем акынын квитанциялары кийин социалдык түйүндөрдө пайда болгон.
Ал эми келерки март айында Өзбекстанда президенттик шайлоо өткөрүлмөкчү.
Өлкөнү СССР кулагандан бери жетектеп келаткан 76 жаштагы Каримов май айында кызматта калуу ниетин кыйыткан.
Ал экинчи мөөнөткө 2007-жылдын декабрында дагы жети жылга шайланган. Эки жыл мурун болсо парламент президенттик мөөнөттү жети жылдан беш жылга кыскарткан.
