Өлкөдө элдин баары дүрбөп президентикке аттанып жатканын кулагы чалып калып, Азыткы алда кайдан түшүп келиптир (же түпкүрдөн жогору чыгып келдиби, айтор, Ала-Тоого жетиптир).
Азыткы оболу талапкер Байкембаевден сураптыр:
- Эмне үчүн шайлоого катышып атасың?
- Партиям талап кылды, арга жок, катышуум керек.
- Максатың эмне?
- Эл-жеримди байытып жыргап-куунап калуу.
Ары жактан айланып өтүп бараткан талапкер Маралбаевден да Азыткы сураптыр.
- Эмне үчүн шайлоого аттанып жатасың?
- Партиям талап кылды, катыш деди, эми катышуум керек ко.
- Мүдөөң эмне?
- Демократиянын туу чокусуна калкымды күргүштөтүп айдап барып жеткирсем дейм.
Азыткы жолун улап, талапкер катары сөзүн кайра-кайра жаттап аткан Куурчаккуловду сөзгө тартыптыр.
- Эмне үчүн талапкердигиңди коюп жатасың?
- Мурдагы “алгачылар” менен “акжолчулар” сүрөөн кылып...
- Кандай долбоорлоруң бар?
- Мурдагы “ажолорду” алып келсем дейм. Алардын аттырганы – Каддафиникине жетпейт, жегени – Мубарактыкына караандабайт. Айланайындарым, тим эле бөөдө жерден качып кеткен периштелер турбайбы!
Андан соң Азыткы өзүн талапкерлердин татыктуусунун татыктуусу көргөн Даарыгановго келиптир:
- Эмне үчүн талапкердигиңди коюп жатасың, мырза?
- Эркекмин да, ошон үчүн.
- Максатың эмне?
- Эрдик кылсаң сүрө кыл дейт. Ушуну аялдарыма далилдегим келет.
Ары басып барып, Азыткы "мыкчегер" талапкер атыккан Дардаңбаевди таап алыптыр:
- Эмне үчүн президенттик шайлоого аттанып атасың?
- Эл деле чыгып атат, эмнем кем экен!
- Тилегиң эмне?
- Эптеп бул кызматка илээшип, миллиард доллар топтоп алсам, бул дүйнөдө армансыз өтөөрмүн дейм да.
Азыткы чымын куюн болуп барып Тайманбас кызына да жолугуптур.
- Эмне үчүн шайлоого катышып атасыз?
- Эмне, аялдардын өкүлү чыкпаса болбойт бекен?
- Ой-максатың эмне?
- Максатымды эмне кыласыз, андан көрө айтсаңыз, сиздин жынысыңыз ким өзү? Силер жакта гендер саясаты болобу деги?
“Ко-окуй” деп андан Азыткы кача жөнөп, анан ойлонуп туруп кайра Дардаңбаевге жетип келиптир.
- Мен өтө талдап көрүп, сенин талапкердигиңди колдоону чечтим.
- Саал кечигип калбадыңбы.
- И, эмне болуп кетти?
- Шериктеш бир кубаттуу өлкөдөн мага эки миллиард доллар келатат. Акысына алар кез-кезде колдоп сүйлөп турушумду каалашат экен. Мага эмне, колдоп койом да. Кез-кезде... Оозум башка темалардан бош боло калганда!
- Жо-ок, жок, жок! Алардан акча алгыча менден ал.
- Канча?
- Менде беш миллиард доллар каражат бар. Эки миллиардын артка кайтарылчу алиги акчанын ордуна аласың, бир миллиарды болсо – шайлоо чыгымдары, бир миллиарды – жеке өзүң чаалыкканда “чай ичип” койгонго...
- Дагы бир миллиардчы?
- Анысы – сендей азаматты тапканым үчүн мага мээнет акы катары калат да!
(Алар өз ара келиштиби-жокпу, ким билсин?!. Саат басып сөз этегин уга албай калганына калем ээси күнү-бүгүнкүгө чейин чындап арман кылып келет).
