Бекешев: Жаңы спикер шайланып, бийликтин мындан аркы кадамы аныкталышы керек

Бишкектеги болуп жаткан окуялардын айланасында Жогорку Кеңештин 6-чакырылышынын депутаты Дастан Бекешев мыйзамсыздык болуп жатканына өкүнөрүн, мындан ары мамлекеттик бийликти сактап калуу зарыл экенин билдирди.

«Мыйзам үстөмдүк кылсын десек, азыр VI чакырылыштын депутаттары жаңы төрага шайлап, мамлекеттин эми эртеңи кандай болот деген маселени чечиши керек», - деди ал «Азаттыкка».

5-октябрда парламенттик шайлоонун жыйынтыгына нааразы болгон партиялар баштаган тынчтык митинги массалык башаламандыкка айланып, 6-октябрда митингчилер парламент менен президент олтурган имаратты, УКМКнын имаратын басып алышты. Азыркы тапта Ала-Тоо аянтында оппозициячыл партиялар митингди улантууда.

Митингге чыккандар КТРКдан түз эфир талап кылышты

Коомдук телеканалдын имаратынын алдында ушу тапта 20дай киши түз эфир талап кылып турушат. "Азаттыктын" кабарчысынын маалыматына караганда, алар каналдын жетекчилиги менен телефондон сүйлөштү.

Алар телеканалдан эфир берүүгө макул болгону кабарланды. Учурда алар каналдын студиясына кирип жайланышты. Элге кайрылуу жасай турган болууда. Муну менен элге маалымат жеткирүүнү көздөй турганын айтышты.

5-октябрда парламенттик шайлоонун жыйынтыгына нааразы партиялардын тарапкерлеринин тынчтык акциясы массалык баш аламандык менен коштолду.

6-октябрда митингчилер парламент менен президент олтурган имаратты, УКМКнын имаратын басып алышты.

“Ала-Тоо” аянтында оппозициячыл партиялардын митинги уланууда. Парламенттик шайлоонун жыйынтыктарына нааразы партиялар 5-октябрда мөөнөтсүз митингге чыкканын жарыялашкан.

Жанарбек Акаев: Бийлик кырдаалды колдон чыгарды

Бул тууралуу «Азаттыктын» түз эфиринде Жогорку Кеңешке «Ата Мекен» партиясынын талапкери, учурдагы парламент депутаты Жанарбек Акаев билдирди. Анын айтымында, абалды жөнгө салуу боюнча бийлик кечигип жатат.

«Бийлик абалды жөнгө салуу боюнча бир күн кечке сүйлөшүүгө келген жок. Эртең саат 9да президент жолугуу өткөрөм дегени менен кечигип калды»,- деди Акаев.

Ошондой эле депутат кайрадан кийин шайлоого акыркы добуш берүүдө алдыга чыккан партиялар катышпашы керек экенин билдирди.

6-октябрга караган түнү Бишкекте парламенттик шайлоонун жыйынтыгына нааразы болуп чогулган митингчилер Кыргызстандын президенти жана парламенти отурган имараттын жетинчи кабатына жетип, президенттин иш бөлмөсүнө чейин кирип кетишти.