Ыктыярдуу элдик кошуундар Бишкекти кайтарып чыкты
Бишкекте ушуну менен экинчи түнү Ыктыярдуу элдик кошуундун өкүлдөрү борбор шаардагы муниципалдык жана мамлекеттик ишканаларды, кафе-ресторан, соода борборлорун кайтарды.
Активисттер баштаган ыктыярдуу топ мамлекеттик номуру жок машинелерди текшерип өткөрүп жатышат.
Өкмөт имаратынын алдында да жүздөгөн ыктыярчылар турду. Кайтарууга алынган объектилердин арасында КТРК, өкмөт үйү, мамлекеттик резиденция, Башкы прокуратура, мейманкана, ири соода борборлор жана башка жайлар бар.
Кыргызстанда 5-октябрда парламент, президенттик администрация отурган имарат жана УКМК демонстранттардын топтору тарабынан басып алынган. 6-октябрдын түнү топтошкон шектүү адамдар ар кайсы мекемелердин, соода борборлордун жанына барганы, бирок ыктыярдуу кошуундар талап-тоноочулук далаалаттарына жол бербегени айтылган.
Кыргызстанда акыркы күндөрү түзүлгөн курч саясий кырдаал Конституция боюнча кандай чечилиши керек? Ушул жана башка суроолорго талдоочу Сания Токтогазиева жооп берди.
Түркия Кыргызстандагы окуяларга тынчсызданат
6-октябрда Түркиянын Тышкы иштер министрлиги Кыргызстанда парламенттик шайлоодон кийин болгон окуялар терең тынчсыздандырарын билдирди.
Министрлик «ал окуялар курчуп кетпей, шайлоого байланыштуу бардык пикир келишпестиктер Конституциянын алкагында, коомдун жарашуусу жана акыл токтотуп жөнгө салынышын каалайбыз» деп белгиледи.
«Биз Кыргызстан мындай маселелерди акыл токтотуп жөнгө салыш үчүн саясий жактан жетилгендигин көрсөтөрүнөн жана эл тилектештигин билдиреринен күмөн санабайбыз. Биз дос жана боордош кыргыз эли жана өлкөдөгү бардык саясий топтор бирге иш алып барып, мындай сезимтал мезгилде Кыргызстандын тынчтыгы жана өнүгүшү үчүн тилектештигин көрсөтөт деп ишенебиз», деп айтылат билдирүүдө.
Сооронбай Жээнбеков: эч бир тарап сүйлөшүү үчүн аянтча сунуштай элек
Үч күндөн бери эл алдына чыкпай жаткан президент Сооронбай Жээнбековдун кезектеги видеокайрылуусу жарыяланды. Президенттин расмий сайтында жарыяланган кайрылуунун текстинде Жээнбеков кризисти чечүү үчүн саясий күчтөрдөн конкреттүү кадамдарды күтүп жатканын билдирген.
“Президент катары ушул абалдан тезирээк чыгууга болгон күч-аракетимди жумшап жатам. Ушул максатта ар кыл саясий тараптар менен жеке сүйлөшүүлөрдү өткөрүп жатам. Урматтуу саясий күчтөрдүн жетекчилери, азыркы саясий туңгуюк абалдан чыгуу үчүн менден президент катары талап кылынчу кадамдарга даяр экенимди дагы бир ирет бидирем. Бирок кырдаалды жөнгө салуу милдетин алам деген тараптардан сүйлөшүү үчүн бирдиктүү аянтча сунуштала элек. Азыркы учурдагы кызмат алмашууларды легитимдештирүү зарыл. Ал үчүн сиздер билгендей, Кыргыз Республикасынын президентинин жарлыктарына кол коюшум үчүн парламент кадрдык дайындоолор жөнүндө тиешелүү токтомдорду киргизиши керек».
Жээнбеков саясий туңгуюктан өлкөнү алып чыгуу үчүн ушул расмий документтер зарыл экенин жана саясий күчтөрдөн кадам күтүп жатканын кошумчалаган.
Ал Кыргызстанда парламенттик шайлоонун баштапкы жыйынтыгына байланыштуу чыккан нааразылык акциялары массалык тополоң менен коштолуп, абал курчуп кеткен 5-октябрдан бери ушуну менен үчүнчү ирет кайрылуу жасады.
6-октябрга караган түнү митингчилер Ак үйдү, УКМКны ээлеп, камактагы бир топ саясатчыларды бошоткон. Президент Сооронбай Жээнбеков буга чейинки кайрылууларында акыркы окуяларды бийликти басып алуу аракети катары баалаган. Жээнбековдун Бишкекте экени айтылганы менен учурда ал эл алдына чыга элек. Өлкөдө азыр саясий кризис өкүм сүрүп жатат.