Аянттагы митингде бир катар партиялардын өкүлдөрү микрофон талашып, пикир келишпестик чыкты. «Ата Мекен» партиясынын талапкери, Жогорку Кеңештин депутаты Элвира Сурабалдиева чогулгандарды ынтымакка чакырды:
«Азыр бул жерде 15 партиянын мүчөлөрү турат. Ар бириңер бөлүнө берсеңер, ыдырап кетебиз. Бийликке ушул керек. Биз бул жакта турсак, тиги жакта эркектер бийлик талашып атышат. Эркектер башкара албаса, мына кыз башым менен мен башкарып берем!» - деди Сурабалдиева.
«Ата Мекен» партиясынын дагы бир талапкери Тилек Токтогазиев «учурдан эски саясатчылар пайдаланып, бийликти колуна алууга аракет кылып жатышат» деп айыптап, аларды митингге да жолотпоого чакырды. Ушул тапта Бишкектин Ала-Тоо аянтында Садыр Жапаровдун өкмөт башчылыкка сунушталышына каршы митинг өтүп жатат.
Бишкек шаарынын Ала-Тоо аянтында Садыр Жапаровдун өкмөт башчы болушуна каршы митинг болуп жатат. Ага «Реформа», «Ата Мекен», «Бир Бол», «Республика» партияларынын өкүлдөрү, жаштар уюмдары, активисттер баштаган бир нече уюмдардын өкүлдөрү катышууда.
Митингде сөз сүйлөгөндөр «өкмөт башчылыкка мурдагы кылмыш дүйнөсүнүн өкүлдөрү эмес, таза, адилет, ачык-айкын иштей турган жаш лидерлер келсин» деп талап кылышууда. Активист Улан Үсөйүн чогулгандарга модераторлук кылып жатат.
«Бир Бол» партиясынан депутаттыкка талапкер Руслан Акматбек уулу: «Бардык саясий тараптарды чакырып, кеңешип иш кылышсын. Жең ичинен сүйлөшпөй, ачык-айкын аракеттерди жасашсын. Азыр эл билбеген бийликти орнотууга аракет кылышууда. Маселе бир кишиде эмес, өлкөбүз үчүнчү жолу революция жасап, кайра эски жолго түшүп жатабыз. Коом өзгөрүү жолуна түшөт деп ойлогонбуз. Элдин үмүтүн бир ууч топ менчиктеп алды», - деди.
Жогорку Кеңештин депутаттарынын спикерди жана өкмөт башчыны шайлаган жыйыны мыйзамсыз. Бул тууралуу Жогорку Кеңештин депутаты Жанарбек Акаевдин «Азаттыкка» билдирди. Депутаттын айтымында жыйынга болгону 30 депутат катышкан жана алар кылмыштуу топтордун басымы менен чакыртылган.
«Булар Сооронбай Жээнбеков менен сүйлөшүп алышкан. Аны президент катары калтырабыз деген аракети бар. Ошол эле убакта булар Матраимовдор менен мамилеси жакын деп бүгүн маалымат алып атабыз. Ошондо «Мекеним Кыргызстандын», «Биримдиктин» өкмөтүн өздөрү шайлашты».
Депутат Акаевдин айтымында бүгүн, 7-октябрда Жогорку Кеңештин жыйыны болот, кворум бар. Анда спикерге жана «элдин ишениминдеги таза, жаштардан куралган жаңы өкмөт» сунушталат.
«Реформа» партиясынын лидери Клара Сооронкулова 6-октябрь күнү кечинде болгон дайындоо чечимдерин мыйзамдуу деп эсептебей турганын атайын билдирүү жасап айтты:
«Эч кимге маалымат бербей эле депутаттар чогулуп алып жыйын өткөрүшкөн. Ага катышкандардын көпчүлүгү «Мекеним Кыргызстан» жана «Биримдик» партияларынан Жогорку Кеңештин VII чакырылышына талапкер болгон депутаттар экен. Бул өтө чоң шектенүү жана кооптонуу жаратууда. Кечээки жыйынга катышкандардын артында Жээнбеков менен Матраимовдордун кланы турушу мүмкүн деп эсептейбиз. Төңкөрүштү кайсы бир саясий күчтөргө ыйгарууга болбойт. Революцияны эл жасады, бийлик да элдики. Юридикалык бардык эрежелер бузулду. Жогорку Кеңештин отурумунун кворуму болгон жок. Өкмөт башчы менен спикерди шайлоо өтө одоно мыйзам бузуу менен ишке ашты. Мындай башаламандыкка жол бере албайбыз. Биз депутат Мыктыбек Абдылдаевди бийликке умтулган ар кандай күчтөрдүн кол жоолугу болбой, спикерлик кызматтан баш тартууга чакырабыз. Алар бийликти басып алышты. Дайындалган өкмөт башчы менен спикердин мыйзамдуулугун тааныбайбыз».