Бишкек мэри Азиз Суракматов кызматтан кеткенин мэрдин жардамчысы Гуля Алмамбетова "Фейсбуктагы" баракчасына жазды.
Ысык-Көлдө элдик коалиция түзүлдү
Ысык-Көлдө 11 адамдан турган элдик коалиция түзүлдү. Бул тууралуу Каракол шаарынын тургуну Таалай Отунчиев билдирди:
"Биз элдик коалицияны түзүп жатабыз, анда бир дагы партиянын өкүлү жок. Эми 11 киши катталган коалиция аймактагы элдин ынтымагын ыдыратпай кармап туруу. Ар бир райондон өкүл киргиздик, алар жер-жерлерде тынчтыкты сактап, облустун өкүлү Балбак Түлөбаевге жардам берип турат. Биз мародёрлукка, башаламандыкка жол бербешибиз керек. Өкмөттүн иши турукташкандан кийин биз аларга баарын өткөрүп берели деп чечтик".
Отунчиевдин айтымында, элдин өтүнүчү боюнча Балбак Түлөбаев "элдик өкүл" болуп калды. Буга чейин Балбак Түлөбаев өкмөттүн облустагы өкүлү кызматын өз каалоосу менен өткөрүп бергени кабарланган.
Балбак Түлөбаев өткөргөн маалымат жыйын.
Депутат Нурбаев парламент мүчөлөрүн тез чогулууга чакырды
Кыргызстанда учурдагы абалды укуктук талаага кайтаруу үчүн Жогорку Кеңештин VI чакырылышы тез арада чогулушу керек.
Бул тууралуу парламент депутату Абдывахап Нурбаев "Азаттык" радиосуна билдирди. Анын айтымында, парламент төраганы алмаштырып, элдик ишенимдеги өкмөттү шайлашы керек:
"Мен алтынчы чакырылыштын депутаттарын тезинен байланышка чыгып, абалды стабилдештирүү үчүн жыйынга чогулууга чакырам. Ар бир мүнөт биз үчүн маанилүү болуп турат. Биз ушул учурда өз мыйзамдуу милдетибизди аткаралы", -деди Нурбаев.
Депутат учурда парламенттин чукул жыйынын өткөрүү боюнча кеңешүү жүрүп жатканын билдирди.
5-октябрда парламенттик шайлоонун жыйынтыгына нааразы болгон партиялар баштаган тынчтык митинги массалык башаламандыкка айланып, 6-октябрда митингчилер парламент менен президент отурган имаратты, УКМКнын имаратын басып алышты. Анда президент отурган жетинчи кабатка чейин адамдар кирип барышкан.
Митингчилер бул имаратка «Ордо» партиясынын лидери Мээрбек Мияровду комендант кылып дайындашканы кабарлаган. Бул партиянын өкүлдөрү Ак үйдүн ичиндеги терезелер, идиштер, компьютерлер талкаланганын билдиришкен.
Президент Сооронбай Жээнбеков 5-октябрдагы окуяны шайлоонун шылтоосу менен бийликти басып алуу аракети деп баалады.