Саламаттык сактоо министрлигинин коомдук кеңеши Жаркынбек Касымбеков менен сүйлөшүп жатат. Касымбеков "Чоң Казат" партиясынын мүчөсү.

Бишкек мэриясындагы абал

Ноокен райондагы өкмөттүн ыйгарым укуктуу өкүлү алмаштырылды

Жалал-Абад облусунун Ноокен районундагы өкмөттүн ыйгарым укуктуу өкүлү Абдрахман Осмоновду райондук администрациянын имаратынын жанына чогулган 200гө чукул адам кызматтан кетүүсүн талап кылды. Ал өз ыктыяры менен кызматын тапшыруу арызын жазып бергенден кийин чогулгандар убактылуу ыйгарым укуктуу өкүлдүн ордуна Нурбек Өмүрзаковду дайындашты.

Ал арада Жалал-Абад облустук администрация имаратынын алдына да эл чогулуп, шаардын мэри, ыйгарым укуктуу өкүлдүн элге чыгуусун талап кылууда.

Аймактардагы администрация имаратынын жанындагы акциялар азыркы тапта Ош шаары, Жалал-Абад, Нарын, Баткен жана Кадамжай шаарларында болууда. 5-6-октябрдын түнүндө Каракол шаарында да митинг болгон. Чогулгандар 4-октябрдагы парламенттик шайлоо калыс өтпөгөнүнө нааразы болушуп, шайлоону мыйзамсыз деп табууну талап кылышууда.

Ошто бийликке нааразылардын митинги өтүп жатат

Ош шаарынын борбордук аянтында митинг уланууда. Алгач бул иш-чарага жүзгө жакын адам чогулуп, алардын алдына Жогорку Кеңештин депутаты Асылбек Жээнбеков чыгып сүйлөгөн. Ал мыйзамдуу жол менен шайланган президентке жана парламентке баш ийүү керектигин белгилеген.

Бирок кийинчерээк митингде бийликке каршы сөздөр айтылып, 4-октябрда өткөн парламенттик шайлоонун жыйынтыгын жокко чыгаруу талабы коюла баштады.

Саат 11:00гө карата аянтта миңден ашуун адам чогулуп турат. Митингде “Бийлик алмашты, кайра эле мурдагы жегич-ичкичтер бийликке келип алышпасын” деген сөздөр айтылып жатат.

4-октябрда Кыргызстанда кезектеги парламенттик шайлоо өттү. 5-октябрда Бишкекте анын жыйынтыгына нааразы партиялар митинг өткөрүп, натыйжада митингчилер президенттин жана парламенттин кеңсесине кирип барышкан.

Президент 6-октябрда видеокайрылуу жолдоп, шайлоонун шылтоосу менен бийликти басып алуу аракети болгонун айтты.