Бакиев баштаган ыңкылап, Бакиев барбаган салтанат

Элдик ыңкылаптын төрт жылдыгына арналган салтанатта мамлекеттик катчы Досбол Нур уулу мурдагы президент Аскар Акаевдин мезгилинде авторитардык башкаруу, коррупция күч алып, бийлик эл менен эсептешпей калганынан улам караламан калк теңсиздикке, мыйзамсыздыкка каршы түп көтөрүлүп чыгышканын белгиледи.

Курманбек Бакиев башында турган Кыргызстан элдик кыймылы 2005-жылы 24-мартта өлкөдө элдик бийликти орнотуп, нукура демократиялык багытка бет алган туруктуу жолун бекемдоо менен Кыргызстандын эл аралык саясий жүзүн чыңдадагынын билдирди:

-Курулай кагазда жазылган демократиядан, нукура реалдуу демократиялык процесстер башталды. Жаңы бийлик бул реалдуу кадамды өзүнүн конструктивдүү жасаган кадамдары менен ачык-айкын далилдей баштады.

Мамлекеттик катчы төрт жыл аралыгында экономикалык жактан кыйла өсүштөр болуп, ички дүң продукция эки эседен ашуун жогорулаганын, бүджет эки жарым эсеге көбөйгөнүн, саламаттык сактоо, билим берүү тармагына ири көлөмдөгү каражаттар бөлүнүп, кызматкерлеринин айлык маяналары эки эсе көбөйтүлгөнүн айтты.

Ал ошондой эле мамлекеттин мындан дагы өнүгүүсүнө тоскоол болгон, ыңкылаптын жеңишин көрө албагандар дагы эле болсо бар экендигин баса белгилеп кетти.

-Төрт жылдан бери элдин жеңишине, өлкөнүн мүлкүн талап-тоноп, капчыгын толтургандар, бийликтен шыпырлгандар элибиздин тынч жашоосуна бүлүк түшүрүп, ызы-чууну токтотпой тополоң салып келе жатышат, - деди Досбол Нур уулу.

Мындан төрт жыл мурда Акаевдин бийлигин кулатууга активдүү катышкан саясатчылардын алдыңкыларынын бири Топчубек Тургуналиев 24-мартта Кыргызстанда нукура элдик ыңкылап болгонун белгилеп, бирок эл ишенип шайлаган президент Курманбек Бакиев айланасына Акаевдин кадрларын топтоп, ашынган коррупциялык, тоталитардык система түзүп, саясий-экономикалык кризиске алып келди деп эсептейт.

-Курманбек Бакиев өзү үй-бүлөсүн бийликтен четтете алган жок. Ал түгүл баласы, туугандары президенттик бийликтин далай жагын тартып кеткен. Ал эми өзүнүн элге берген убадасын, антын аткара алган жок. Бир сөз менен айтканда, тарыхый элдин тагдырын чече турган революциянын бир дагы максаты ишке ашкан жок.

Тургуналиев белгилегендей өлкө башчысы Курманбек Бакиев март ыңкылабынын талаптарын тез эле эсинен чыгарып, ички жана тышкы саясатта туура эмес иш жүргүзүп жатканынан улам күндөн-күнгө эл ишениминен кетип баратат. «Анын эл арасында кадыры кандай экенин 27-мартта болуучу митингде көрөсүңөр»,-дейт Тургуналиев:

-2005-жылы Курманбек Бакиевди элдин 90-95 пайызы колдоп жатса, азыркы күндө тескерисинче 95 пайыздын айланасындагы элдин көпчүлүгү нааразы.

Бир катар саясатчылар мындан төрт жыл мурда 24-мартта мамлекеттик төңкөрүш болгонун айтып келишсе, талдоочулар бийлик элден алыстап жеке адамга сыйынуучулук, үй-бүлөлүк башкарууга өтүп, катардагы калк менен эсептшпей калганынан улам элдик ыңкылап болгонун айтышууда.

Айрым жарандык коомдун өкүлдөрү, укук коргоочулар Аскар Акаевдин учурунда жетишилген демократиялык баалуулуктар азыркы бийлик тушунда жоголуп баратканын белгилешип, Шайлоо кодексинин терс жагына өзгөрүшү, пикет, митинг өткөрүүгө, сөз эркиндигине чектөөлөрдүн киргизилиши, жарандык коомдорго кысым көрсөтүлүп, буйрутма адам өлтүрүүлөрдүн көбөйүшү эл арасында нааразылык жаратып жатканын айтышууда.

Байкоочулардын баамында опера жана балет театрында өткөн 24-март ыңкылабынын салтанатына арналган жыйынга президент келбегендиктен өкмөттүн курамы дагы толук катышпай, театрда бош орундар көп болуп, балкон бош турду.

Жыйын соңунда 24-марттагы окуяларды чагылдырган видео тасма көрсөтүлүп, кыргыз көркөм өнөрлөрүнүн чеберлеринин жана балдардын катышуусундагы бий ансмблдеринин концерти тартууланды.