Москвада турак жай комплексиндеги жарылуудан бир киши каза болгонун, төртөө жараланганын ТАСС кабар агенттиги чукул кырдаал кызматтарына шилтеме жасап жазды. Маалымат каражаттары жана Телеграм-каналдар дүйшөмбүдө эртең менен “Алые паруса” комплексинде болгон окуяны кол салуу деп сыпаттап жатышат.
Жабыркагандардын бири өзүн “ДНР” деп атаган аймактын орус бийлиги түзгөн Бокс федерациясынын жетекчиси жана “Армениялык батальондун” негиздөөчүсү Армен Саркисян экени кабарланууда.
Жергиликтүү тургундар Север.Реалии сайтына айтып бергендей, жарылуудан көп өтпөй тез жардам жана өрт өчүрүүчү машиналары келген. Дагы бир киши катуу жарылуу болгонун, подъездде сигнализация иштей баштаганын Mash Телеграм-каналына айтты.
Тартип коргоо органдары жардыргыч затты үйгө курьер алып кирген болушу ыктымал деп ТАСС агенттигине маалымдашты. Кабарга ылайык, жарылуунун күчү тротилл эквиваленти менен өлчөгөндө 1 кг жетти.
Ал эми Mash жабдык комплекстеги дивандын алдына коюлган, алыстан башкарылган болушу мүмкүн деп жазды.
Окуя боюнча кылмыш иши козголду.
"Интерфакс" полицияга таянып Армен Саркисян каза тапканын маалымдады. Башка булактар, анын ичинде ТАСС жана РИА "Новости" ал оор жараат алганын жазууда.
Горловский деген ат менен да белгилүү Саркисян Украинада 2014-жылы Майдандагы демонстрациялар учурунда катышуучуларга кол салуу үчүн атайын кошуундарды уюштурган деп шектелүүдө. Украин маалымат каражаттары аны "криминалдык төбөл" деп аташат. Ага 2014-жылы издөө жарыяланган.
Былтыр декабрда Украинанын укук коргоо органдары Саркисянга мыйзамсыз куралдуу кошуунга мүчө болгону жана агрессор-мамлекетке көмөктөшкөнү үчүн айып таккан.
Саркисян түптөгөн "Армениялык батальон" (АРБАТ) орус Коргоо министрлигинин астындагы "Редут" менчик аскердик компаниясына баш ийет. Алар Украинадагы согушка катышканын "Важные истории" басылмасы жазды.
Шерине