Лицензия берүүдөгү жемкорлукка шек саналып кармалган Геология жана жер казынасын пайдалануу мамлекеттик агенттигинин мурдагы директору Мелис Сатыбековдун камактагы мөөнөтү 4-мартка чейин узартылды.
Бишкектин Биринчи май райондук сотунун басма сөз кызматы анын камактагы мөөнөтүн узартуу боюнча арызды 2024-жылдын 30-декабрында Улуттук коопсуздук боюнча мамлекеттик комитеттин (УКМК) Башкы тергөө башкармалыгынын улук тергөөчүсү берип, ал канааттандырылганын билдирди. Бул маалымат 7-январда маалым болду.
2024-жылы 13-сентябрда мурдагы вице-премьер министр Дүйшөнбек Зилалиев менен Мелис Сатыбеков кармалган. Бишкектин Биринчи май райондук соту Дүйшөнбек Зилалиевди 4-ноябрга чейин камакка алган. Ал былтыр 30-сентябрда эч жакка чыкпоо тил каты менен тергөө абагынан бошотулганы 6-январда белгилүү болду.
УКМК аларга лицензия берүүдөгү жемкорлукка байланыштуу айып такканын “Азаттыкка” атайын кызматтагы булактар билдирген. Жергиликтүү маалымат каражаттары экөө тең 2017-жылы кызматта турганда “мыйзамсыз иштерди жасаган” деп шек саналып жатканын жазышкан.
51 жаштагы Зилалиев 2016-2017-жылдары Өнөр жай, энергетика жана жер казынасын пайдалануу комитетин жетектеген. 2017-жылы августта өкмөттүн экономика маселелерин караган вице-премьер-министр болуп дайындалып, 2018-жылы Мамлекеттик мүлктү башкаруу фондуна жетекчи болгон.
44 жаштагы Мелис Сатыбеков тууралуу ачык булактарда кенен маалымат жок. Анын интернеттеги өмүр баянында Энергетика жана өнөр жай министринин орун басары, Геология жана жер казынасын пайдалануу мамлекеттик агенттигинин директору болуп иштегени тууралуу жазылган. (BTo)
Шерине