Казакстандын Мангыстау облусунун Актау шаарына жакын жерде учак кулап түштү.
“Азаттыктын” казак кызматы жазгандай, учак Азербайжандын борбору Бакудан Чеченстандын баш калаасы Грозный шаарына бараткан.
Маалымат агенттиктери билдиргендей, Azerbaijan Airlines авиакомпаниясынын учагы Каспий деңизинин үстүнөн учуп өтүп баратканда авариялык кырдаал тууралуу маалымат берген.
Кырсык болгонун Казакстандын Өзгөчө кырдаалдар министрлиги ырастады.
“Актауда учак кырсыгы болгон жерге ӨКМдин өздүк курамынын 52 кызматкери жана 11 техникасы барды. Барган маалда учактын күйүп жатканы аныкталган”, - деп айтылат министрликтин маалыматында.
Куткаруучулар учак кулап түшкөн жердеги өрттү өчүрүүдө. Жабыркагандардын саны такталууда.
Казакстандын Саламаттык сактоо министрлиги алты адам аман калганын билдирүүдө. Tengrinews басылмасы Мангыстау облустук саламаттык сактоо мекемесине таянуу менен кырсык болгон жерден Актау ооруканасына 12 адам жеткирилгенин жазды.
Embraer 190 учагынын бортунда 67 адам жана экипаждын 5 мүчөсү болгону маалымдалды. Baza телеграм каналы жүргүнчүлөрдүн көбү Азербайжандын жарандары экенин, андан сырткары учакта Орусиянын, Тажикстандын, Кыргызстандын, Казакстандын жарандары да бар экенин кабарлоодо.
Казакстандын Транспорт министрлиги учак кырсыгы боюнча атайын иликтөө иштери жүрөрүн билдирди.
“Болгон окуя боюнча абал такталууда. Атайын иликтөө иши жүрөт”, - деп билдирди мекеме.
“КазАэроНавигация” ишканасы кырсык учактын канаттуулар менен кагылышынан жана башкаруудагы катачылыктан улам болушу мүмкүн деп божомол кылууда. (TAb\ErN)
Шерине