Президент Садыр Жапаров Кыргызстан менен Түркиянын жылдык соода жүгүртүүсүн 5 миллиард долларга жеткирүү үчүн Анкарадан айрым жеңилдиктерди сурады.
Ал Түркияда Кыргызстандын негизги экспорттук товарларына жеңилдик берилбегенин Түркиянын президенти Режеп Тайип Эрдоган менен 5-ноябрдагы жолугушууда айтты.
“Ушуга байланыштуу Кыргызстандын экспорттук товарларына жеңилдетилген бажы тарифтерин киргизип берүүңүздөрдү суранам. Кыргызстан бүгүнкү күндө Борбор Азияда суу-энергетикалык ресурстарга бай өлкө. Кыргызстандын гидроэнергетикалык потенциалы 142 миллиард киловатт/саатты түзсө, өлкөнүн суу-энергетикалык ресурстарын өздөштүрүү дарамети 13% гана түзүүдө. Түрк компанияларынын орто жана чакан ГЭСтерди куруу долбоорлоруна катышуу мүмкүнчүлүгүн карап чыгууну сунуштайм”, - деди Садыр Жапаров.
Президент быйыл 1-майдан тартып кыргыз-түрк ташуучулары эки өлкөгө жүк ташуу үчүн уруксат кагазы жокко чыгарылганын маалымдады.
Түркиянын лидери Эрдоган мамлекеттик сапары менен 4-ноябрда Бишкекке келди. Ал 6-ноябрда Бишкекте өтүүчү Түрк мамлекеттер уюмунун он биринчи саммитине да катышат.
Түрк президенти буга чейин Кыргызстанга 2018-жылы келген.
Шерине