Президент Садыр Жапаров ички иштер министринин мурдагы орун басарлары Алмазбек Орозалиевди, Мирлан Каниметовду, Ош облустук ички иштер башкармалыгынын (ОИИБ) мурдагы башчысы Малик Нурдиновду милициянын генерал-майору наамынан ажыратты.
Андан тышкары Улуттук коопсуздук боюнча мамлекеттик комитеттин (УКМК) төрагасынын мурдагы биринчи орун басары Талантбек Салиев менен УКМКнын 9-кызматынын экс-жетекчиси Санжарбек Эркинбаевдин генерал-майор аскердик наамы алынды.
Тиешелүү жарлыкка Садыр Жапаров 10-октябрда кол койгонун президенттин басма сөз катчысы Аскат Алагөзов билдирди. Ал аскердик наамдар убагында мыйзамсыз берилген деген негиз менен алынганын айтты.
Экс-президент Сооронбай Жээнбеков кызматтан кетер алдында - 2020-жылдын 14-октябрында сөз болуп жаткан беш адамга наам ыйгарган. Сооронбай Жээнбеков 16-октябрда Жогорку Кеңеште кайрылуу жасап, расмий түрдө президенттик кызматтан кеткен.
2020-жылдын 4-октябрында Кыргызстанда кезектеги парламенттик шайлоо өткөн. Анын жыйынтыгына нааразы болгондордун митинги 6-октябрга караган түнү башаламандык менен аяктап, бийлик алмашкан. (BTo)