Борбордук шайлоо комиссиясы жергиликтүү кеңештерди шайлоого аралыктан добуш берүүнүн жол-жобосу тууралуу маалымат таратты. 17-ноябрда өтчү шайлоого аралыктан добуш бере тургандар 1-ноябрь саат 18:00гө чейин белгиленген арыз кабыл алуу жайларына кайрылышы керек.
Ошондой эле Борбордук шайлоо комиссиясынын маалыматтык тутумундагы “шайлоочунун кабинети” аркылуу арыз калтырса болот.
Арыз каралып, Борбордук шайлоо комиссиясы жаранга шайлоо участкасын аныктап берет. 17-ноябрда жаран ошол участоктон өзү катталган аймактын жергиликтүү кеңешинин талапкерине же партияга добуш берет.
Жергиликтүү кеңештин депутаттарын шайлоо 17-ноябрда өтөт.
Шаардык кеңештердин депутаттыгына талапкерлердин тизмесин көрсөтүү шайлоо дайындалган күндөн тартып, 7-октябрда саат 18:00гө чейин жүргүзүлөт, талапкерлерди каттоо 18-октябрда аяктайт.
Айылдык кеңештердин депутаттыгына талапкерлерди көрсөтүү 17-октябрь саат 18:00гө чейин, ал эми каттоо 28-октябрь күнү аягына чыгат.
17-ноябрда 264 жергиликтүү кеңешке, анын ичинде 33 шаардык, 231 айылдык кеңешке депутаттарды шайлоо болот. Шайлоону уюштуруу жана өткөрүү менен өлкө боюнча 56 аймактык жана 2438 участкалык шайлоо комиссиялары алектенет.
2024-жылдын 5-сентябрына карата шайлоочулардын жалпы саны 4 миллион 121 миң 44 адамды түзөт. Үгүт өнөктүгү 17-октябрда башталат. Шайлоого 39 партия катышууда. (TAb)
