Нарын облусунун Жумгал районуна караштуу Өрнөк айылынын мал кайтаруу үчүн жайлоого кетип, дайынсыз болуп жаткан 45 жана тогуз жаштагы эки тургунун издөө иши уланууда.
Бул тууралуу Өзгөчө кырдаалдар министрлиги 22-октябрда кабарлады. Издөө иштерине куткаруучу, милиция жана жергиликтүү тургундар болуп жалпысынан 93 киши тартылды.
Мал кайтарууга кеткендердин төрт күндөн бери дайыны чыкпай жатканы тууралуу маалымат 20-октябрда түшкөн.
Ушул эле күнү ӨКМден 11 куткаруучу, милициядан 12 кызматкер жана жергиликтүү тургундар болуп жалпысынан 111 адам издөө ишине тартылган.
Чаткалда 9-октябрда Каныш-Кыя айылынын тургундары жана бир чет элдик жарандан турган 14 кишилик топ, эндик өсүмдүгүнүн тамырын издеп, тоого кеткенден кийин дайынсыз жоголгон.
16-октябрда издөө иштеринин натыйжасында сегиз жаран аман-эсен табылган, кар көчкү алдында калган алты кишинин сөөгү 19-октябрда табылды. Аларды издөөгө ӨКМдин тик учагы, кошумча куткаруучулар тобу тартылган. (КЕ)
