Украинанын Орусиянын агрессиясына каршы согушуна курал-жарак жагынан жардам берип жаткан донор өлкөлөрдүн “Рамштайн” форматындагы ушул апта соңуна пландалып жаткан кезектеги жогорку саммити өтпөй турган болду. Бул маалыматты 9-октябрда “Эркин Европа/Азаттык” радиосуна кеминде эки булак тастыктап, себеби АКШ президенти Жо Байден Флорида штатына жакындап бара жаткан “Милтон” бороонуна байланыштуу Германияга баруудан баш тартууга мажбур болгонунда экенин билдиришти.
Саммит Байдендин Германияга 10-13-октябрга пландалган сапары учурунда өтмөк.
Ак үйдүн билдирүүсүндө айтылгандай, Байден жолго 8-октябрда чыкмак, бирок сапарын “Милтон” бороонунун кесепетин алдын алууга даярдык жана өлкөнүн түштүк-чыгышындагы “Хелен” бороонунан кийинки көйгөйлөдү чечүү иштерин көзөмөлдөө үчүн башка убакытка калтырды.
Кечээ 8-октябрда украин тарап да быйыл ноябрда Киевде өткөрүүнү пландап жаткан экинчи "Тынчтык саммити" кийинкиге калтырылганын маалымдаган.
Синоптиктер кооптуулук жагынан эң жогору 5-категория деп сыпатталып жаткан бороон Флорида үчүн акыркы жүз жылдан берки эң катуу табигый кырсык болушу ыктымал экенин эскертип жатышат.
Бороон боюча улуттук борбор 9-октябрда эртең менен “Милтон” Тамп шаарынан түштүк-батыш тарапка жетип калганын, ылдамдыгы саатына 260 чакырым болуп жатканын кабарлады.
Флориданын батыш тарабын эки апта мурда “Хелен” бороону каптаган. Жалпысынан АКШда бул бороондон 230дай кишинин өмүрү кыйылган. (RK)
