Улуттук коопсуздук мамлекеттик комитетинин төрагасы Камчыбек Ташиев атайын кызматтын кызматкерлерин мамлекеттик органдардын ишине негизсиз кийлигишүүсүнө тыюу салган буйрукка кол койду.
Бул тууралуу УКМКнын басма сөз кызматы 2-октябрда билдирди.
Маалыматта Камчыбек Ташиев өткөргөн кеңешмеде өздүк курамга эскертүү бергени, атайын кызматтын жетекчилеринин жакындарынын өтүнүчүн канааттандыруу үчүн мамлекеттик мекемелерге кийлигишүүгө тыюу салганы жазылган.
30-сентябрда УКМКнын басма сөз кызматы Камчыбек Ташиевдин кызына айдоочулук күбөлүк алууга жардам берген атайын кызматтын жети кызматкерине чара көрүлгөнүн маалымдаган.
Ташиев буга чейин 25-сентябрда атайын кызматтын Кызыл-Кыя шаардык бөлүмүнө курулган жаңы имараттын ачылышында сүйлөп жатып Кыргызстанда бийлик тууган-туушкандарын жана жакындарын мамлекеттик ишке аралаштырбай турганын билдирген. Тууган-уруктарды бийликке аралаштырбоо боюнча президент Садыр Жапаровдун да тапшырмасы бар экенин айткан.
Кыргызстанда мурдагы бийликтердин убагында үй-бүлөсү, жакындары, дос, туугандары мамлекеттин ишине кийлигишкени, адамдарды кызматтарга чейин дайындоо сыяктуу маселелерге аралашканы тууралуу сын-дооматтар айтылып келген. Анын арты элдик нааразылыкка жана президенттердин мөөнөтүнөн мурда кызматтан кетүүсүнө чейин жеткен учурлар болгон. (TAb)
