Президент Садыр Жапаров 30-сентябрда “Кабар” мамлекеттик агенттигине курган маегинде 40ка жакын жетекчиге демөөрчүлүк фондунан жардам берип турарын билдирди. Мамлекет башчы ал фонддун бюджетке тиешеси жок экенин, мындай материалдык жардам мамлекеттик кызматкерлердин маянасы аз болгону үчүн берилип жатканын тактаган.
"Дароо айта кетейин: менин демөөрчүлүк фондум бюджеттик фонд эмес. Ошондуктан 40ка жакын жетекчиге материалдык жардам берип турам. Анткени эмгек акылары чындыгында аз. Эмне үчүн материалдык жардам десеңер, алар өздөрү жетектеген мекемеден уурдабаш үчүн, ошол мекемеде тартип орнотуш үчүн, өзү таза болуш үчүн берип турам. Алардын арасында кечээ камалган “Унаанын” жетекчиси да бар эле".
Президент Транспорт каражаттарын жана айдоочулук курамды каттоо боюнча мамлекеттик агенттинин (“Унаа” ишканасы) директору, коррупцияга шек саналып камалган Рустам Жокоевге да “таза иштеши үчүн” айына демөөрчүлүк фондунан 2 миң доллар берип келгенин кошумчалаган.
Демөөрчүлүк фондуна акча кайдан келерин, кимдер демөөрчү болорун тактаган эмес.
Быйыл 1-январда Бишкектин “Ала-Тоо” аянтына жаңы туунун Жогорку Кеңеш кабыл алып, өкмөттүн токтому менен бекитилгенден башка варианты илингени талкуу жаратканда президент Жапаров аны демөөрчүлөр каржылаганын билдирген.
Былтыр 17-июнда Улуттук коопсуздук комитетинин (УКМК) Таластагы башкармалыгынын жаңы имаратынын ачылышында курулушка бюджеттен каражат кетпегенин, демөөрчүлөрдүн колдоосу менен курулганын айткан.
Мындан тышкары Президенттин өзүнүн фонду бар. Бюджет кодексинде Президенттин фондундагы каражаттар инвестициялык, инфратүзүмдүк долбоорлорду, билим берүү программаларын жана чет өлкөдө окуган студенттерди каржылоого, калктын социалдык-экономикалык абалын жакшыртууга жана башка иш-чараларга жумшалары жазылган. Фонддогу каражатты пайдалануу тартиби президенттин чечими менен аныкталат.
