25-сентябрда Жогорку сот Сокулуктун Селекция айылындагы жол тосууга айыпталып кармалгандарды актоо боюнча Чүй облустук сотунун чечимин күчүндө калтырты. Бул тууралуу “Азаттыкка” айыпталгандардын бири, блогер Эртай Искаков билдирди.
"Чүй облустук соту быйыл 12-апрелде толугу менен актаган. Июнь айында прокурор кассациялык арызды Жогорку сотко жазган экен. Кечээ отурум болуп, Жогорку сот Чүй облустук сотунун чечимин күчүндө калтырды", - деди Искаков.
Былтыр 20-ноябрда Сокулук райондук сотунун чечими менен Эртай Искаковго 50 миң сом айыппул салынган, ушул айылдын тургундары Бакыт Балбаев жана Бактыбек Бекболотов 100 күндүк коомдук жумушка тартылган.
Үчөө тең Кылмыш-жаза кодексинин "Бейбаштык" беренеси боюнча акталган, ал эми "Жолдорду мыйзамсыз тосуу" беренеси боюнча айыптуу деп табылган.
Адвокаттар бул чечимге каршы экенин айтып, Чүй облустук сотуна кайрылган.
Былтыр июлдун башында Селекция айылынын жана Сары-Өзөн жаңы конушунун тургундары аптапта суу жоктугуна нааразы болуп, Бишкектеги Жайыл Баатыр (Түштүк магистраль) көчөсүн тосушкан.
Нааразылык акциясына катышкан бир нече кишини милиция 15-июлда суракка чакырган.
Алардын арасынан митингди видеого тартып, Инстаграм аркылуу түз эфирге чыгарган блогер Эртай Искаков, жергиликтүү тургундар Бакыт Балбаев жана Бактыбек Бекболотов камакка алынган.
Үчөөнө тең "жол тосууну уюштурган, бейбаштык кылган" деген берене менен иш козголгон. 20-сентябрда алар сот чечими менен үй камагына чыккан. (MKt)
