Bloomberg агенттиги 2025-2027-жылдарга федералдык бюджеттин долбоорун изилдеп чыгып, 2025-жылы Орусия аскердик чыгымдарын быйылкы жылга салыштырмалуу 27% көбөйтүүнү пландап жатканын жазды.
Ага ылайык, Орусиянын коргоо тармагына кеткен чыгым 13,2 триллион рублди түзүшү керек (2024-жылы ал 10,4 триллион болгон). Бул Орусиянын жалпы ички дүң өнүмүнүн (ИДӨ) 6,2% түзөт.
Жалпысынан улуттук коргонууга жана улуттук коопсуздукка кеткен чыгым өлкөнүн 2025-жылга карата жалпы бюджетинин 40% жакынын түзөт. Бул өлкөнүн билим берүү, саламаттыкты сактоо жана социалдык тармакка бөлүнгөн каражаттан да көп.
Бюджеттин жашыруун бөлүгү 12,9 триллион рублди түзүшү керек (2024-жылы жашыруун беренелерге 11,1 триллион рубль бөлүнгөн). Бул жалпы бюджеттин 30% жакынын түзөт. (BTo)
