Ош шаарында ата-энеси жазалады деген беш жашар бала үй-бүлө жана балдарды реабилитациялоо борборуна убактылуу жайгаштырылды. Бул тууралуу Эмгек, социалдык камсыздоо жана миграция министрлиги кабарлады.
Мекеменин билдиришинче, баланын апасы уулу жолдогу машиналарга, кошуналардын терезесине таш ыргытканы үчүн урушканын айткан, бирок такай сабап, кол көтөргөнү, зомбулук көрсөткөнү тууралуу сөздөрдү жокко чыгарган. Ал учурда экинчи күйөөсү менен жашары, жети айлык кош бойлуу экени белгилүү болгон.
Ош шаардык милициясы бул окуя териштирилип жатканын, үй-бүлөнүн тек-жайы аныкталганын билдирген.
Анын алдында социалдык тармактарда денесинин айрым жерлери көгөргөн, жара болгон, аны атасы менен апасы урганын айткан жашы жете элек баланын видеосу жарыяланган.
Ага чейин Ошто балдарга карата зомбулукка байланыштуу дагы бир видео жарыяланган. Анда Алай районунун тургуну беш-алты жашар баласына орой мамиле жасап, одоно сөздөр менен сөгүп, уктатпай, караңгыда бөлмөдөн кууп чыкканы тартылган.
Акыйкатчы Жамиля Жаманбаева бул окуянын тергелип-териштирилишин өз көзөмөлүнө алган. Балага тиешелүү экспертизалар дайындалды жана ал таенесинин үйүнө жеткирилген.
