Чүй облустук ички иштер башкармалыгынын (ОИИБ) маалыматына караганда, наристенин сөөгү 27-августта саат 11:00 чамасында Чоң Чүй каналынын Кант шаарындагы түтүгүнөн табылган.
Учурда бардык тиешелүү соттук-укуктук экспертизалар дайындалды. Бул факт боюнча тергөө иштери уланып жатканы кабарланды.
19-августта Ысык-Ата райондук милициясына үч жаштагы наристенин дайынсыз жоголгону тууралуу маалымат түшкөн. Милиция кызматкерлери, Өзгөчө кырдаалдар министрлигинин куткаруучулары, ыктыярчылар баланы издөөгө күн сайын чыгып жатканы, бирок натыйжасыз болуп жаткан.
Баланын ата-энеси Ысык-Ата районундагы Дружба-Достук айылынын тургундары 26-августта уулунун сөөгүн табууга көмөктөшүүнү өтүнүп, президент Садыр Жапаровго кайрылышкан.
Өзгөчө кырдаалдар министрлигинин маалыматына караганда, быйыл алты айда 46 киши сууга чөккөн. Алардын тогузу Ысык-Көлдө катталган.
Июлдун башында Ысык-Көлдө сууга сүзүп жатып, 11 жаштагы кыз чөгүп кеткени соцтармактарга жарыяланды.
Расмий маалыматка ылайык, 2023-жылы Кыргызстанда 95 адам сууга агып же чөгүп каза болгон, анын ичинен 36сы балдар. (ZKo)
