Министрлер кабинетинин төрагасы Акылбек Жапаров Кыргызстанда курулуп, ишке берилген жалпы билим берүүчү мектептердин жана турак жайлардын саны союз мезгилиндеги көрсөткүчтөн ашып түшкөнүн билдирди. Жапаров бул тууралуу 9-августта куруучулар күнүнө карата жасаган кайрылуусунда билдирди.
Өкмөттүн сайтындагы маалыматка караганда, 1985-жылы Кыргыз ССРинде 1096 миң чарчы метр, 1990-жылы 1560 миң чарчы метр турак жай имараттары пайдаланууга берилип, бул эң жогорку көрсөткүч болгон. Ал эми 2023-жылы 1587,5 миң чарчы метр турак жай имараттары пайдаланууга берилди.
Жалпы билим берүүчү мектептерди ишке киргизүү боюнча эң жогорку көрсөткүч 1968-жылы жана 1987-жылы болуп Кыргыз ССРинде 50 мектеп ишке берилсе, ал эми 2023-жылы 105 мектеп пайдаланууга берилген.
Акылбек Жапаров быйыл 30-майда акыркы үч жылда 214 жаңы мектеп салынганын айткан.
Буга чейин өкмөт 2024-жылы өлкөдө 212 мектеп, 50 бала бакча ачыла турганын маалымдаган.(ZKo)
