Министрлер кабинети кыргыз-тажик чек арасынын 94% тилкеси такталганын ырастады. Бул боюнча 30-июлда “Азаттыкка” өкмөттүн чек ара боюнча өкүлү Назирбек Бөрүбаев билдирди. Анын айтымында, чечиле элек 6% тилке Баткен районунун аймагындагы “татаал жерлер”.
“11-17-августта эки өлкөнүн өкмөттөрүнүн жумушчу топторунун жолугушуусу өтөт. Биз калган жерлерди да тактаганга аракет кылабыз”, - деди Бөрүбаев.
Мунун алдында тажикстандык басылмалар Согд облусунун башчысы Ражаббой Ахмадзоданын 26-июлдагы маалымат жыйында айткандарына таянып, кыргыз-тажик чек арасынын 94% бөлүгү такталганын жазып чыгышкан.
Президент Садыр Жапаров былтыр жыл аягында Баткенге барганда Тажикстан менен чек ара 2024-жылдын жаз айларына чейин такталып каларын айткан.
Эки өлкөнүн чек арасынын жалпы узундугу 972 чакырым. 2022-жылы президенттер жолуккан маалда мунун 664 чакырымы боюнча орток пикир табылганын айтышкан.
Чек ара такталбагандыктан суу, жер, жол, жайыт талаштан улам аймакта байма-бай чыр-чатактар катталып келген. 2021-жылдын апрель-майында жана 2022-жылдын сентябрында чек арада кандуу кагылышуулар болгон.
