Бишкек шаардык милициясынын басма сөз кызматы борбор калаадагы “Ататүрк” сейил багында жашы жете элек кыз менен жыныстык катнашка шектелген жаран кармалганын билдирди.
Мекеменин 29-июлдагы маалыматына караганда, 20-июлда Октябрь райондук милициясына арыз түшкөн. Анда апасы ошол түнү 2009-жылы туулган жашы жете элек кызы менен жыныстык катнашка барган жаранга чара көрүүнү өтүнгөн.
Бул факты боюнча Октябрь райондук миилциясынын тергөө кызматы Кылмыш-Жаза кодексинин 157-беренеси (Он алты жашка толо элек бала менен сексуалдык мүнөздөгү аракеттер) менен кылмыш ишин козгоп, бардык экспертизалар дайындалган.
Кылмышка шектүү катары 1999-жылы туулган М.А. аттуу жаран кармалып, убактылуу кармоочу жайга киргизген. Кийин Октябрь райондук соту анын бөгөт чарасын карап, СИЗО-1 тергөө абагына каммакка алуу чечимин чыгарган.
Башкы прокуратуранын маалыматы боюнча, Кыргызстанда 2023-жылы жашы жете электерге карата 406 оор жана өзгөчө оор кылмыш жасалганы аныкталган. Анын басымдуу бөлүгү Чүй облусунда катталган.
Кылмыш иштеринин 160ы зордуктоого байланыштуу.
