Израил оккупациялап алган Голан дөңсөөлөрүндөгү Маждаль-Шамс шаарына жасалган чабуулда кеминде 12 адам мерт болуп, дагы 30дан ашыгы жараат алды. Израил армиясынын (ЦАХАЛ) билдиришинче, набыт кеткендер жана жараат алгандар 10-20 жашта болгон.
Ракеталык сокку Ливан тараптан келгени айтылууда. Ал футбол аянтчасына, балдар топ ойноп жаткан маалда урулган.
Тель-Авив буга байланыштуу ливандык “Хезболла” радикал тобун күнөөлөдү. Бирок бул уюм Маждаль-Шамска жасалган чабуулга тиешеси жоктугун билдирди.
Израилдин түндүгүн жана Голан дөңсөөлөрүнүн” Хезболла” соңку учурда маал-маалы менен аткылап келген.
Ушул тушта АКШда жүргөн өлкөнүн премьер-министри Биньямин Нетаньяхунун канцеляриясы ал сапарын токтотуп, "мүмкүн болушунча эрте кайтып келерин" билдирди. Ал “Хезболла” олуттуу кесепеттерге кабыларын эскертти.
Израил 1967-жылы араб мамлекеттеринин коалициясына каршы алты күндүк согушта Сириянын Голан дөңсөөсүнүн көпчүлүк бөлүгүн жана Иерусалим шаарынын чыгыш бөлүгүн ээлеп, 1981-жылы аннексиялап алган.
Израил менен Ливандын чек арасындагы кырдаал былтыр октябрда АКШ менен Европа мамлекеттери террордук деп эсептеген Палестинадагы ХАМАС тобу Израилге кол салгандан кийин курчуй баштаган.
