Кыргызстанда мындан ары көзү ачыктык, бүбү-бакшылык, төлгө салуу, сыйкырчылык менен алектенүүнү жарнамалоого жол берилбейт. “Жарнама жөнүндөгү" мыйзамга өзгөртүү киргизилип, ага президент Садыр Жапаров 19-июлда кол койду.
"Мыйзамдын максаты - оккульттук, сыйкырчылык жана башка анык эмес ыкмалар менен жарандардын аң-сезимине таасир көрсөтүүнү болтурбоо" деп айтылат Президенттик администрация тараткан маалыматта.
Мыйзам долбоорун бир ай мурда Жогорку Кеңеш кабыл алган. Демилгечилердин бири - депутат Марлен Маматалиев.
Министрлер кабинети эми жарнамалоого тыюу салынуучу кызматтардын тизмесин аныктоого тийиш. (SE)
