Ички иштер министрлигинин (ИИМ) Жол кыймылынын коопсуздугун камсыздоо башкы башкармалыгы жол кырсыктарын азайтып, алдын алуу максатында дрондорду колдоно баштайт. Бул тууралуу аталган башкармалыктын басма сөз кызматы кабарлады.
Ага ылайык, алгач тесттик режимде дрондор аркылуу Бишкек-Нарын-Торугарт жолунда байкоо жүргүзүлө баштады.
“Акыркы учурда жол кырсыктары көбөйгөнүнөн улам Кыргызстандын бардык аймактарында тесттик режимде дрон учуруп, байкоо жүргүзүү башталганы турат. Учурд ,дрон менен байкоо жүргүзүү программасы Бишкек-Нарын-Торугарт жолунда ишке киргизилди”,-деп жазылган маалыматта.
ИИМ быйыл төрт айда Кыргызстанда жол кырсыктары 4% өскөнүн билдирген.
Өткөн айда ички иштер министри Уланбек Ниязбеков Кыргызстанда жол кырсыгы азайбай жатканын улам аталган башкармалыктын ишин сынга алып, бир катар тапшырмаларды берген.
Расмий маалыматка ылайык, былтыр жети миңдей жол кырсыгы катталып, 783 адамдын өмүрү кыйылган жана бул 2022-жылга караганда 13,5% көп.
