20-апрелден тартып 1-июлга чейинки аралыкта Кыргызстанда 17 адам селге агып каза тапты. Бул тууралуу Өзгөчө кырдаалдар министрлигинин Жарандык коргонуу башкармалыгынын өкүлү Кубаныч Темирбек уулу 2-июлда брифингде билдирди.
Адистин сөзүнө караганда быйылкы жылы өлкөдө 250 сел катталды. Анын эң көбү - 71 учур Ош облусунда, андан кийин Баткен облусунда -66, Жалал-Абадда - 61, Талас облусунда -13, Ош шаарында -6, Нарын облусунда -5 учур.
Селдин кесепетинен баштапкы маалыматтар боюнча, мамлекетке жалпы 172 млн 956 миң сом зыян келтирилген. Чыгымдар эсептелип жатат.
Темирбек уулунун маалымдашынча, 28-июнда жүргөн селден Ноокатта 28 үй, үч социалдык мекеме жабыркады. Үч үй авариялык абалга кептелди. 15 чакырым жол жарактан чыкты. 29 мал-жандык селге агып кетти.
"Азаттыктын" эсебинде апрелден берки табигый кырсыктан ондон ашуун бала каза тапты.
28-июнда Ноокаттагы селде 10 адам каза тапса, сегизи жашы жете элек бала болгон.
30-июнда Кара-Кулжа районунда селге аккан автоунаада ата-энеси менен чогуу эки бала каза тапты.
Өткөн аптанын башында Баткен облусунун Кадамжай районунда беш жаштагы бала селге агып, чарчап калган.
Андан мурдараак Жалал-Абад облусундагы Ноокен районунда 10 жашар тестиер селге агып, набыт болгон.(ZKo)
