Кыргызстандын Баткен, Жалал-Абад, Ош жана Талас облустарында селге байланыштуу чукул кырдаал киргизилди. Бул тууралуу Өзгөчө кырдаалдар министрлигинин Жарандык коргонуу башкармалыгынын өкүлү Кубаныч Темирбек уулу 2-июлда журналисттерге билдирди.
"Селдин материалдык жана экономикалык кесепетин эсептөө жана жоюу үчүн аймакта чукул кырдаал киргизилет. Андан кийин кырдаал алынат", - деди ал.
Акыркы эки жумада Ош, Жалал-Абад, Баткен облустарында селден 16 адамдын өмүрү кыйылды. Ташкындаган суу мал-жандыкты агызып, ички жолдор жана көпүрөлөр жараксыз абалга кептелди. Ондогон үйлөргө, короолорго ылай толуп калды.
Ноокат, Кара-Кулжа райондорунда бана табият кырсыгы болгон башка аймактарда сел жууган жерлерди тазалоо, оңдоо жана чыгымдарды тактоо иштери уланууда.
Бир апта мурун Талас облусунун Бакай-Ата районунда нөшөрлөп жааган жаандан жана мөндүрдөн улам айыл чарба талаалары зыян тартып, айрым үйлөрдү суу каптаган.
Өзгөчө кырдаалдар министрлиги 7-июлга чейин нөшөрлүү жаан-чачынга байланыштуу Кыргызстандын тоолуу аймактарында сел коркунучу бар экенин, дарыяларда суунун деңгээли көтөрүлүшү мүмкүндүгүн эскертти.
Акыркы күндөрү дүйнөнүн бир катар мамлекеттеринде нөшөрлүү жаандан улам сел болуп жатат. (ZKo)
