Салык кызматынынын төрагасынын орун басары кызматына Нургүл Салиева дайындалды. Ал өткөн жумада жемкорлукка шек саналып кармалган Адилет Дубанаевдин ордуна келди. Тийиштүү буйрукка Министрлер кабинетинин төрагасы кол койгону 25-июнда кабарланды.
Нургүл Салиева буга чейин Салык кызматынын алдындагы "Салык Сервис" мамлекеттик мекемесинин директору болгон.
Улуттук коопсуздук боюнча мамлекеттик комитет (УКМК) Адилет Дубанаев кармалганы тууралуу 21-июнда маалымат тараткан. Ал “Салыктык башкарууну жана статистикалык системаны модернизациялоо” долбоорун ишке ашырууда ири өлчөмдө жемкорлукка жол бергени айтылган.
Дубанаевдин адвокаты жана жакындары комментарий бере элек. (SE)
