Бишкектеги Кыргыз-түрк достугу ооруканасында боорду алмаштыруу операциясы экинчи бейтапка да жасалып, ийгиликтүү өткөнүн Саламаттык сактоо министрлиги маалымдады. 50 жаштагы бейтаптын да, ага донор болгон кызынын да абалы туруктуу.
11-июндагы 9 саатка созулган операцияны Кыргызстандын жана Түркиянын дарыгерлери жасашты, жараянга саламаттык сактоо министри Алымкадыр Бейшеналиев көзөмөл кылды.
10-июнь күнү аталган ооруканада 51 жаштагы бейтаптын боору алмаштырылган. Министрлик бейтаптын абалы жакшы экенин, операциядан кийин эсине келгенин, алмаштырылган боор иштей баштаганын маалымдаган.
Боорду алмаштыруу программанын башталышы үчүн президенттик фонддон 1 млн доллар бөлүнгөн.
Расмий маалыматка ылайык, учурда Кыргызстанда 17 миңдей адам боор оорусунан жабыркап келет. Алардын ичинен бир канчасы трансплантацияга муктаж.
Быйыл февраль айында Кыргызстанда алгачкы жолу бөйрөк алмаштыруу операциясы ийгиликтүү аяктаган. Андан бери он чакты бейтапка операция жасалды. Кезекте 110 бейтап турат.(ZKo)
Бишкекте экинчи бейтаптын да боорун алмаштыруу операциясы ийгиликтүү болгону айтылды
Facebook шеринеси