Ички иштер министрлигинин (ИИМ) Жол кыймылынын коопсуздугун камсыздоо башкы башкармалыгынын маалыматы боюнча, өлкөдө жол кырсыктарынын 92% айдоочулардын күнөөсүнөн болот.
Мекеме айдоочулар автоунааны каттуу ылдамдыкта айдагандан, карама-каршы тилкеге чыгуудан, мас болуп машина айдагандан, кууш, тар жерлерде айдоочулар бири-бирине жол бошотуп бербегендиктен кырсык көп катталып жатканын билдирди.
Расмий маалыматка ылайык, 2024-жылдын 1-январынан 17-мартына чейин Кыргызстанда 1 173 жол кырсыгы катталып, 82 адам каза болуп, 1 673 киши жаракат алган.
Өлкөдө 2023-жылы 6 945 жол кырсыгы катталып, андан 783 адам каза болгон. Көз жумгандардын саны 2022-жылга салыштырганда 13,5% көп. 2022-жылы 7 040 жол кырсыгынан 11 миң 49 киши жаракат алып, 690 адам жашоо менен кош айтышкан. (BTo)
