АКШ Конгрессинин Өкүлдөр палатасы ушул аптада Израилге, Украинага жана Кошмо Штаттардын башка да союздаштарына аскердик жардам көрсөтүү тууралуу бир нече мыйзам долбоорун талкуулап, добушка коёт. Бул тууралуу 15-апрелде палата спикери Майк Жонсон билдирди.
Жонсондун айтымында, мыйзам долбоорлорунда Израилдин коргонуусуна каражат бөлүү, Украинага аскердик жардамды каржылоо, Тайванга жана башка союздаштарга жардам көрсөтүү, Украинага буга чейин бөлүнгөн каражаттын кайсы бир бөлүгүн кайтарып алуу шарттары жана АКШда камакка алынган орусиялык мамлекеттик активдердин эсебинен Украинага жардам бөлүү тууралуу жазылган.
"Бизди бүт дүйнө карап, реакциябыз кандай болорун күтүп турганын билебиз. Террорчулар, тирандар жана Путин, Си, ирандыктар сыяктуу коркунучтуу лидерлер Америка өзүнүн союздаштарына колдоо көрсөтө алабы, өзүнүн дүйнөдөгү кызыкчылыктарын коргой алабы деп карап турушат", – деди Майк Жонсон.
Мыйзам долбоорлору былтыр күзүндө иштелип чыккан. Бирок Конгресстеги республикачылардын жана демократтардын талашынан улам бири да кабыл алына элек.
Украинанын коргоо министри Рустем Умеров 25-февралда "Украина. 2024-жыл" форумунда сүйлөп жатып, Батыш убада кылган аскердик жардамдын жарымы өз маалында келбей жаткандыктан Украина жоокерлеринен да, жерлеринен да айрылып жатканын айткан. (RK)
