Грекияда бүгүн 16-апрелде кезектеги Жайкы Олимпиада оюндарынын оту жанды. Салтка айлангандай эле, отту жандыруу салтанаты Олимпиада оюндарынын мекени – Байыркы Олимпиядагы Гера храмында өттү, ага Грекия президенти Катерина Сакелларопулу, Эл аралык олимпиада комитетинин башчысы Томас Бах, Париждин мэри Анн Идальго катышты.
Олимпиада отунун эстафетасы алгач Грекиянын аймагы аркылуу өтүп, 8-майда Франциянын Марсел шаарына жеткирилет. От жалпысынан 600 кишинин колунан өтөт.
Кезектеги, 33-жайкы оюндар быйыл Парижде 26-июлдан 11-августка чейин жүрөт. Жалпысынан оюндарды көрүү үчүн Парижге миллиондогон туристтер барары кабарланууда. Буга байланыштуу Франция өкмөтү коопсуздук чараларын күчөтүү аракетин көрүп жатат.
Олимпиаданын ачылыш салтанаты Парижде 26-июлда болот.
Жайкы Олимпиада оюндары Францияда буга чейин 1900-жылы жана 1924-жылы да уюштурулган. (RK)
