Ош облусунун Кара-Суу районунда беш жашар кызды зордуктаган деген шек менен 31 жаштагы адам кармалды. Бул тууралуу “Азаттыкка” Ош облустук милициясынын басма сөз кызматы билдирди.
Шектүүгө каршы кыздын атасы арыз жазган. Кармалган адам милиция бөлүмүнө алынып келип, териштирүү иштери жүрүп жатат.
Башкы прокуратуранын расмий маалыматы боюнча, Кыргызстанда 2023-жылы балдарга каршы 1 832 кылмыш жасалган. Мунун ичинен 478и Бишкекте, 427и Чүй облусунда, 220ы Жалал-Абадда, 225и Ош облусунда, 177и Ош шаарында, 119у Ысык-Көлдө, 89у Баткенде, 58и Нарында жана 39у Таласта катталган.
Акыйкатчы институту 2022-жылы Кыргызстанда жашы жете элек балдарга зордук-зомбулук, адам укугун бузуу боюнча иштердин 31% кыскартылып, 32% гана сотко жеткенин маалымдаган. Калган 37% создуктурулуп, өндүрүштө калган. (DSh)
