Жогорку Кеңеш 11-апрелде "Билим берүү жөнүндө" мыйзам долбооруна өзгөртүү киргизүүнү үчүнчү окууда талкуусуз колдоду. Бул мыйзам долбоорунда бала бакчалардын тамак-ашына акча мамлекеттик казынадан бөлүнөрү жазылган.
2023-жылы күзүндө Каржы министрлиги Кыргызстанда бала бакчаларда ата-энелердин эсебинен тамактануу уюштуруларын билдирген. Министрлик буга ошол жылы 11-августта "Билим берүү жөнүндө" мыйзамдын жаңы редакциясы кабыл алынганын негиз кылган.
Мыйзамдын 28-беренесинин 6-пунктунда "мектепке чейинки билим берүү уюмдарында тамактанууну уюштуруу ата-энелердин (мыйзамдуу өкүлдөрүнүн) эсебинен жүзөгө ашырылат" деп жазылган.
Бул маалымат коомчулуктун нааразылыгын жаратып, депутаттар мыйзамды өзгөртүүнү сунуштаган.
Расмий маалыматтарда Кыргызстанда 1-6 жаштагы 960 миңдей баланын 740 миңдейи бала бакчага барбайт. (TSh)
