16-февралда Орусияда түрмөдө табышмактуу жагдайда каза болгон оппозициялык саясатчы Алексей Навальный жана анын жесири Юлия Навальная немистердин «Маалымат каражаттарынын эркиндиги үчүн сыйлыгына» ("Freiheitspreis der Medien") татыды.
"Навальныйлар - өнүккөн, жаңы, эркин жана демократиялык Орусиянын жүзү. Алар - биздин замандагы каршылык көрсөтүүнүн, дүйнөнү өзгөртүү үчүн өмүрүн арноого даяр болгон баатырлар", - деп белгиледи сыйлыкты ыйгаруу тобу.
Сыйлык жыл сайын Германиянын экс-канцлери Людвиг Эрхарддын урматына уюштурулган форумда тапшырылат. 19-апрелде Бавариядагы Гмунд-на-Тегернзе шаарындагы салтанаттуу иш-чарага Юлия Навальная катышат.
Сыйлык сөз жана ой-пикир эркиндиги, диалог, демократияны жайылтууга чык ыкласы менен берилген коомдук ишмерлерге ыйгарылат. Аны 2023-жылы орус оппозициясынын тайманбаган өкүлү, атактуу шахматчы Гарри Каспаров алган. Ошондой эле Украинанын президенти Владимир Зеленскийге жана мурдагы советтик лидер Михаил Горбачевго да ыйгарылган.
