Кыргызстанда 2023-жылы 740 миңге жакын адам микрокредиттик компаниялардан 51 млрд сом насыя алды. Улуттук статистика комитети 2022-жылга салыштырмалуу насыя алгандар 10%, ал эми берилген насыянын суммасы 29,5% көбөйгөнүн билдирди.
Насыя алгандардын көбү Бишкек шаарында (10 млрд сом) жана Ош (8,5 млрд сом), Чүй (8,2 млрд сом), Жалал-Абад облустарында (7,8 млрд сом).
Насыянын 48% турмуштук керектөөгө, 23% жакыны айыл чарбасындагы ишмердикти өнүктүрүүгө, 12% соода жана коомдук тамактануу чөйрөсүнө, 5,5% курулушка алынган.
Өлкөдө жакырчылык менен үй-бүлөлүк кирешенин азайышы жарандарды насыя алууга түрткөн факторлордун бири катары аталып келет.
Президент Садыр Жапаров былтыр 3-ноябрда Бишкекте “Жакырчылык жана теңсиздик” деп аталган улуттук форумдагы видеокайрылуусунда элди жакырчылыктан чыгарууга өкмөт аракет кылып жатканын, эл аралык коомчулуктун да колдоосу маанилүү экенин билдирген. (BTo)
