Кыргызстандын Орусиядагы элчилиги Красногорск шаарындагы "Крокус Сити Холл" концерттик залындагы кандуу окуяда кыргызстандыктардын бар-жогун тактоо жүрүп жатканын кабарлады.
“Алдын ала эки жаран жабыркагандыгы тууралуу маалымат такталып жатат. Окуя болгон жерде консулдук кызматкерлер иш жүргүзүүдө”, - деп айтылат маалыматта.
Социалдык тармактарда "Крокус Сити Холлдо” иштеген эки кыргызстандык кыз изделип жатканын жазышууда. Бирок, бул боюнча расмий маалымат жок.
Красногорск шаарындагы "Крокус Сити Холл" концерттик залындагы кандуу окуяда каза болгондордун саны акыркы маалыматтар боюнча 115ке жетти. Бул тууралуу Орусиянын Тергөө комитети кабарлады. Мекеме курмандыктар саны дагы көбөйүшү мүмкүн экенин билдирүүдө.
Алдын ала маалыматта каза тапкандарга ок тийген, айрымдары ышка ууланышкан. Москва облусунун Саламаттык сактоо министрлиги каза болгон 40 адамдын аты-жөнүн, туулган жылын тактады. Мекеме 140 киши жабыркаганын кабарлады. Айрым медиа каражаттары 180ден ашык киши жараат алганын жазып жазышууда.
Орусиянын Федералдык коопсуздук кызматынын (ФСБ) башчысы Александр Бортников президент Владимир Путинге "Крокус Ситидеги” кол салууга шектүү 11 киши кармалганы жөнүндө маалымат берди. Бул тууралуу ТАСС агенттиги Кремлдин пресс-кызматына таянып жазды.
Алар Брянск облусунда кармалышкан. Федералдык коопсуздук кызматы кол салуу дыкат даярдалганын билдирди.
Куралчан белгисиз топ 22-марттын кечинде Москванын четиндеги "Крокус Сити Холл" концерттик залына миңдеген адам топтолгон учурда ок жаадырган. Орусиянын Тергөө комитети окуяны "теракт" деп атап, кылмыш ишин козгоду. (TSh)
